काठमाडौँ । अविरल वर्षा र बाढीपहिरोका कारण देशका विभिन्न छ ठाउँमा आज पनि राजमार्ग बन्द रहेका छन्। नेपाल प्रहरीका केन्द्रीय प्रवक्ता एवं नायब महानिरीक्षक विनोद घिमिरेले सङ्खुवासभा, सिन्धुपाल्चोक र रसुवा जिल्लाका छ ठाउँमा राजमार्ग अवरुद्ध रहेको जानकारी दिए।
उनका अनुसार बिहान ९ बजेसम्मको विवरणअनुसार सङ्खुवासभाको भोटखोला गाउँपालिका-४ बरुणमा कोशी राजमार्ग पूर्ण रूपमा अवरुद्ध छ। सोही जिल्लाको मकालु गाउँपालिका-३ एकुवामा पनि अविरल वर्षाका कारण कोशी राजमार्ग बन्द रहेको छ। यो सडक विगत लामो समयदेखि अवरुद्ध रहेको छ।
रसुवाको गोसाइँकुण्ड नगरपालिका-२ मा बाढीका कारण सडक खुल्न सकेको छैन। यसले नेपाल–चीन जोड्ने नाका सञ्चालनमा असर पुर्याइरहेको छ। त्यस्तै, रसुवाको गोसाइँकुण्ड नगरपालिका-२ तातोपानीमा पनि पहिरोले पासाङल्हामु सडकखण्ड अवरुद्ध बनाएको छ। प्रहरीका अनुसार पहिरो पन्छ्याउने प्रयास जारी छ।
सिन्धुपाल्चोकको सुनकोशी गाउँपालिका-७ एककिलोमा आइतबारदेखि परेको वर्षासँगै आएको पहिरोले अरनिको राजमार्ग अवरुद्ध भएको छ। भोटेकोशी गाउँपालिका-२ बाह्रकिलोमा खसेको पहिरोका कारण पनि अरनिको राजमार्ग पूर्ण रूपमा अवरुद्ध रहेको जानकारी घिमिरेले दिए ।
प्रहरी नायब महानिरीक्षक घिमिरेका अनुसार नारायणगढ-मुग्लिन सडकखण्डअन्तर्गत तुइन खोलामा आएको पहिरो पन्छाएर आज बिहानदेखि सडक सञ्चालनमा आएको छ।