काठमाडौँ । नेकपा माओवादी केन्द्रको जारी केन्द्रीय समितिमा समूहगत निष्कर्ष राख्ने क्रम सुरु भएको छ । उपत्यका विशेष प्रदेशबाट प्रस्तुतीकरण सुरु भएको छ ।
यो समूहका नेता जगत सिंखडाले अध्यक्ष पुष्पकमल दाहाल ‘प्रचण्ड’ले प्रस्तुत गरेको प्रतिवेदन सर्वम्मतिमा पास गरेको रिर्पोटिङ गरेका छन् ।
एउटा प्रदेशबाट रिर्पोटिङ गरेपछि एक जना पदाधिकारीले बोल्ने र त्यसपछि अर्को प्रदेशमा जाने र फेरि एक जना पदाधिकारीले बोल्ने गरी समय व्यवस्थापन गरिएको छ ।
कोशी प्रदेशपटि उपमहासचिव हरिबोल गजुरेल बोले । उनले वर्तमान नेतृत्वको निरन्तरता आवश्यक रहेको बताएका छन् । अहिले लुम्बिनी प्रदेशको निष्कर्ष प्रस्तुत भइराखेको छ ।
काठमाडौँको प्रज्ञा भवनमा बिहीबार सुरु भएको बैठकमा अध्यक्ष ‘प्रचण्ड’, वरिष्ठ उपाध्यक्ष नारायणकाजी श्रेष्ठ र उपमहासचिव जनार्दन शर्माको डकुमेन्ट प्रस्तुत भएका थिए ।
‘प्रचण्ड’ले केन्द्रीय समिति भंग गरेर महाधिवेशन आयोजक समिति बनाउने प्रस्ताव राखेका छन् । आगामी मंसिरमा विशेष महाधिवेशन गर्ने प्रस्ताव राखेका छन् ।
वरिष्ठ उपाध्यक्ष श्रेष्ठले आगामी फागुन २१ मा हुने प्रतिनिधि सभाको चुनाव पछाडि महाधिवेशन गर्नु उपयुक्त हुने बताएका छन् । नेतृत्वको सन्दर्भमा अध्यक्ष ‘प्रचण्ड’ले छोड्ने र कार्यवाहक अध्यक्ष आफूले पाउनुपर्ने प्रस्ताव राखेका छन् ।
उपमहासचिव जनार्दन शर्माले सबै पदाधिकारी नआउने गरी नयाँ टिम ल्याउने प्रस्ताव राखेका छन् । हाल रहेका पदाधिकारी निर्देशक समितिमा रूपान्तरित भएर रहने उनको प्रस्ताव छ ।
तीन वटै प्रस्तावमाथि छलफल गरेर समूहगत निष्कर्ष प्रस्तुत गर्ने क्रम चलिरहेको छ । समूहगत छलफल सकिएपछि अध्यक्ष ‘प्रचण्ड’ले जवाफ दिने र प्रतिवेदन पारित गरेर बैठक सक्ने तयारी छ ।
