
काठमाडौँ। नेकपा माओवादी केन्द्रले केन्द्रीय समिति विघटन गरेर महाधिवेशन आयोजक समिति बनाउने प्रस्ताव गरेको छ ।
आज बसेको पदाधिकारी बैठकले यो प्रस्ताव केन्द्रीय समितिमा लैजाने निर्णय गरेको प्रवक्ता अग्नि सापकोटाले जानकारी दिए ।
सापकोटाका अनुसार पुष्पकमल दाहाल ‘प्रचण्ड’कै संयोजकत्वमा आयोजक समिति बनाउने पदाधिकारी बैठकको प्रस्ताव छ । आगामी ९ असोजमा बस्ने केन्द्रीय समिति बैठकमा यो प्रस्तावमाथि छलफल हुने सापकोटाले जानकारी दिए । त्यसअघि ८ गते स्थायी समिति बैठक बस्ने छ ।
माओवादी बैठकले फागुन २१ मा घोषित मितिमा निर्वाचन गराउन पार्टीको तर्फबाट भूमिका खेल्ने निर्णय पनि गरेको छ ।
माओवादीमा नेतृत्व हस्तान्तरणको विचार, विधि प्रक्रियाबारे प्रारम्भिक छलफल भएको पनि सापकोटाले जानकारी दिए । बैठकले देशभक्त, लोकतान्त्रिक र परिवर्तन–अग्रगमनका पक्षधर सबैलाई वर्तमान परिस्थितिबारेमा एकताबद्ध भएर अघि बढ्न अपिल गरेको छ ।