काठमाडौँ- ऊर्जा, भौतिक योजना र सहरी विकासमन्त्री कुलमान घिसिङले देश निर्माणको अभियानमा एकजुट भएर अघि बढ्न आह्वान गरेका छन् ।
शुक्रबार यातायात ब्यबस्था विभाग मीनभवनमा पुगेर श्रमदान अभियानमा सहभागी हुँदै घिसिङले देश–विदेशमा रहेका नेपाली मिलेर जेन-जी आन्दोलन क्षति भएका पूर्वाधारलाई पहिलेको अवस्थामा फर्काउँदै देश निर्माण गर्ने अभियानमा जुट्नुपर्ने बताए ।
उनले क्षति भएका पूर्वाधारलाई नेपालको पूर्वाधार हामी आफै बनाउँछौ भन्ने अभियानका साथ देशैभर सञ्चालन गरिने भएकाले त्यसमा सहभागी हुन अनुरोध गरे ।
आन्दोलनका क्रममा करिब दुई खर्ब भन्दा बढीको क्षति भएको प्रारम्भीक अनुमान गरिएको उनले जानकारी दिए । मन्त्री घिसिङले नेपालीहरूको श्रमदान र आर्थिक सहयोगमा पुन:र्निमाण गर्न कोष खडा गरिएको पनि बताएका छन् ।
पुनर्निर्माणमा विदेशमा रहेका नेपालीहरुको धेरै सहयोग आवश्यक रहेको उनले बताएका छन् ।
मन्त्री घिसिङले विदेशमा रहेका नेपालीको मताधिकार, नागरिकता तथा भिसाको समस्यालाई वर्तमान सरकारले समाधान गर्ने प्रतिवद्धता जनाए । त्यस्तै उनले छिटै मन्त्रिपरिषद् विस्तार गर्न प्रधानमन्त्री सुशीला कार्कीले आन्तरिक छलफल गरिरहको जानकारी दिए ।
