काठमाडौँ । उच्च अदालत पाटनमा बन्दी प्रत्यक्षीकरणसम्बन्धी निवेदन दर्ता र सुनुवाइ भदौ २९ गते आइतबारदेखि पुनः सुचारु हुने भएको छ। अदालतले नियमित पेशीमा रहेका मुद्दाको सुनुवाइलगायत अन्य कामकारबाहीहरू पनि आवश्यक व्यवस्थापनपछि सुचारु गरिने जनाएको छ।
उच्च अदालत पाटनको आज बसेको आकस्मिक बैठकले भदौ २४ गतेदेखि जेनजेड आन्दोलनका कारण रोकिएका सबै कार्य कारबाही पुनः सुचारु गर्ने निर्णय गरेको हो। अदालतले मुलुकी फौजदारी कार्यविधि संहिता, २०७४ को दफा ५९, मुलुकी देवानी कार्यविधि संहिता, २०७४ को दफा २२५, र सर्वोच्च अदालतको बृहत् पूर्ण इजलासको आदेशलाई आधार मानेर यो निर्णय गरेको जनाएको छ।
सुनुवाइ पुनः सुरु भएपछि, कर्फ्यु र निषेधाज्ञा हटेपछि आवतजावत सहज भएको मितिले अदालतमा उपस्थित भई म्याद र तारिख थाम्न सकिनेछ।
