काठमाडौं । नेपाल खेलकुद पत्रकार मञ्चले एनएसजेएफ पल्सर स्पोर्ट्स अवार्डको २२ संस्करणका निम्ति वर्षका उत्कृष्ट खेलाडी र प्रशिक्षकको मनोनयन सार्वजनिक गरेको छ । शनिबार (भदौ २१) काठमाडौंमा पत्रकार सम्मेलन गर्दै मञ्चले उत्कृष्ट वर्ष खेलाडी पुरुष, महिला, युवा र प्रशिक्षकको मनोनयन सार्वजनिक गरेको हो ।
चारै विधामा उत्कृष्ट पाँच/पाँच खेलाडी र प्रशिक्षक मनोयनमा परेका छन् । उत्कृष्ट पुरुष वर्ष खेलाडीको मनोनयनमा दीपेन्द्रसिंह ऐरी (क्रिकेट), कुशल भुर्तेल (क्रिकेट), जनक चन्द (खोखो), स्यान्टु श्रेष्ठ (टेबलटेनिस) र विजय सिन्जाली (उसु) छन् ।
महिला उत्कृष्ट वर्ष खेलाडीको मनोनयनमा एरिका गुरुङ (कराँते), मानमती धामी (खोखो), एलिसा रास्कोटीमगर (कराँते), रेखा पौडेल (फुटबल) र सलिना श्रेष्ठ (भलिबल) छन् ।
यस्तै, युवा वर्ष खेलाडीको मनोनयनमा पूजा महतो (क्रिकेट), अञ्जली महर्जन (कराँते), स्वस्तिका तिरुवा (बक्सिङ), अजय विक (एथलेटिक्स) र समीर तामाङ (फुटबल) छन् ।
उत्कृष्ट प्रशिक्षकको मनोनयमा कविराज नेगी लामा (पारा तेक्वान्दो), कुशल श्रेष्ठ (कराँते), महेश रिजाल (क्रिकेट), लक्ष्मीनारायण वैद्य (खोखो) र दीपक महर्जन (बक्सिङ) पर्न सफल भएका खेलाडी छनोट समितिका संयोजक अनिल मल्ल ठकुरीले जानकारी दिए । मनोनयनमा परेका पाँचजनाबाट अवार्डका दिन विजेता घोषणा गरिने उनले बताए ।
पल्सर स्पोर्ट्स अवार्ड यही भदौ २९ गते पोखरामा आयोजना गरिँदै छ । यो अवार्ड पहिलोपटक उपत्यकाबाहिर गर्न लागिएको हो ।
पिपुल्स च्वाइससहित वर्ष खेलाडी पुरुष, महिला, प्रशिक्षक र युवाका गरी पाँच विजेताले पल्सर मोटरसाइकल पुरस्कार पाउनेछन् । अरू विधाका विजेता तथा सम्मानित व्यक्तिले जनही एक लाख रुपैयाँ प्राप्त गर्ने मञ्चले जनाएको छ ।
