धादिङ — नेपाल पर्वतारोहण संघ (NMA) मा नेतृत्व चयनको तयारी भइरहेका बेला धादिङबाट आएका मतदाताहरूले विगतका नेतृत्वप्रति असन्तोष प्रकट गरेका छन्।
उनीहरूले विगतमा महासचिवजस्तो गरिमामय पदमा रहँदा पनि योगदान दिन नसकेका नेताले संघलाई थप संकटतर्फ धकेलेको आरोप लगाएका छन्।
तीन वर्षसम्म महासचिव पदमा बसेका नेताले कुनै ठोस काम नगरेको मात्र नभई, उल्टै संघलाई कमजोर पार्ने निर्णय गरेको भन्दै उनीहरूको आलोचना गरिएको छ।
चार जना कर्मठ कर्मचारीलाई जबर्जस्ती निकालेर २५ लाख रुपैयाँ क्षतिपूर्ति तिर्नुपर्ने अवस्था सिर्जना गर्नु, पोखरामा रहेको माउन्टेन म्युजियमलाई उपेक्षा गर्दै ध्वस्त हुने अवस्थामा पुर्याउनु, ककनी प्रशिक्षण केन्द्रलाई गौशाला जस्तै बनाउनु र केन्द्रीय कार्यालय लिलामको अवस्थामा धकेल्नु जस्ता कदमलाई मतदाताले ‘ठूलो गल्ती’ भनेका छन्।
यति मात्र होइन, संघ स्थापना कालदेखि प्राप्त ३२ मध्ये २७ हिमचुलीहरूको अधिकार राज्यलाई प्रत्यक्ष हस्तान्तरण गर्नु ऐतिहासिक भूल भएको भन्दै उनीहरूले आक्रोश पोखेका छन्।
सो समयमा अध्यक्षको साधारण भूमिकामाथि ‘रजगज गर्ने’ महासचिवकै प्रभाव रहेको उनीहरूको आरोप छ। धादिङका मतदाताहरूले भने, “पर्यटन पेशा र आरोहणको शानसँग खेल्नेहरू कसैका साथी हुन सक्दैनन्।
भ्रममा नपरी नेतृत्व छनोटमा विवेक प्रयोग गर्नुपर्छ। जात, दल र भूगोलको रंगमा फस्ने समय होइन।” उनका अनुसार, संघलाई अहिलेको संकटबाट जोगाउन सक्ने निर्भिक व्यक्तित्व भनेको फुर ग्याल्जेन शेर्पा मात्र भएको विश्वास उनीहरूले व्यक्त गरेका छन् ।
