काठमाडौं । फिनल्याण्डमा संसद भवन भित्रै एक युवा सांसद मृत भेटिएका छन् । सोसल डेमोक्र्याटिक पार्टीका ३० वर्षीय सांसद इमेली पेल्टोनेन राजधानी हेलसिन्कीस्थित मुख्य संसद भवनभित्रै मृत भेटिएका हुन्।
घटना मंगलबार बिहानको हो । बिबिसीका अनुसार पेल्टोनेनले आत्महत्या गरिएको अनुमान छ । घटनास्थल र उनको शव हेर्दा घटना शंकास्पद नभएकाले पेल्टोनेनले आत्महत्या गरेको हुनसक्ने अनुमान छ ।
बिहान ११ः०६ बजे प्रहरी घटनास्थल पुगेको थियो । संसदमा ग्रीष्मकालीन बिदा चलिरहेको थियो । घटनापछि फिनल्यान्डको सबै दलका राजनीतिज्ञहरूले दुःख व्यक्त गरेका छन् । सोसल डेमोक्रेटिक संसदीय दल नेता टिट्टी टुप्पुरेनेनले विज्ञप्ती जारी गरेर घटनाप्रति दुःख व्यक्त गरिन् ।
‘उनी एक प्रिय सदस्य थिए र हामी उनलाई धेरै सम्झनेछौं । एउटा युवा जीवन धेरै चाँडै समाप्त भयो,’ टुप्पुरेनेनले जारी गरेको विज्ञप्तीमा भनिएको छ । प्रधानमन्त्री पेटेरी ओर्पोले दिनभरका लागि सबै आधिकारिक राजनीतिक कामहरू स्थगित गरेका छन् ।
उनले पेल्टोनेनको सम्मानमा एक मिनेटको मौन धारण समेत गरेका थिए । सभामुख जुसी हल्ला–अहोले पनि पेल्टोनेनलाई सबै दलमा सम्मान गरिने एक मन पराइएका सहकर्मी भन्दै सम्झिएका छन् ।
पेल्टोनेन सन् २०२३ मा पहिलो पटक दक्षिणी उसिमान क्षेत्रबाट सांसदमा निर्वाचित भएका थिए । उनी १८ वर्षको उमेरमै जार्भेनपा सहरको नगर परिषद् सदस्यमा र २२ वर्षको उमेरमा नगर बोर्डको अध्यक्षमा चुनिएका थिए । जुन पदमा पुग्ने उनी सबैभन्दा कान्छो व्यक्ति थिए ।
गत जुन महिनाको अन्त्यतिर, पेल्टोनेनले सामाजिक सञ्जालमा आफू ‘मिर्गौलाको समस्या’ र त्यसपछिको संक्रमणका कारण केही हप्तादेखि संसदीय कामबाट टाढा रहेको जानकारी दिएका थिए ।
उनले अस्पतालबाट डिस्चार्ज भइसकेको तर स्वास्थ्य अवस्थाका कारण बिरामी बिदामा बसेर पूर्ण रूपमा निको हुनमा ध्यान केन्द्रित गरिरहेको बताएका थिए । हाल प्रहरीले मृत्युको कारणबारे अनुसन्धान गरिरहेको छ । प्रहरीका अनुसार, यस घटनामा अहिलेसम्म कुनै आपराधिक पक्ष जोडिएको देखिएको छैन ।
