गोरखा — महान चाड बडादशैंको अवसर पारेर गोरखा बारपाक सुलिकोट–०७ स्थित धारापानी खेलमैदानमा ‘भुवानी कप’ खुल्ला फुटबल प्रतियोगिता आयोजना हुने भएको छ।
आयोजक समितिका अनुसार प्रतियोगिता असोज ८ गते (२०७९–०६–०८) उद्घाटन खेलसँगै सुरु भई असोज १३ गते (फुलपाती) सम्म सञ्चालन हुने छ।
प्रतियोगितामा विजेता टिमले एक लाख एक रुपैयाँ (रु. १,००,००१) पुरस्कार प्राप्त गर्नेछ भने उपविजेताले ४९ हजार ९९९ रुपैयाँ पाउनेछन्। साथै प्रतियोगितामा उत्कृष्ट खेलाडी, उत्कृष्ट गोलकर्ता, उत्कृष्ट डिफेन्डर र उत्कृष्ट गोलकिपरलाई जनही ३,००० रुपैयाँका दरले पुरस्कृत गरिनेछ।
खेलाडी संख्या ६+३ जनामा सीमित हुने प्रतियोगितामा सहभागी हुन इच्छुक टोलीले असोज ८ गते दिउँसो २ बजेसम्म ८,००० रुपैयाँ दर्ता शुल्क र १,००० रुपैयाँ यलो/रेड कार्ड शुल्क सहित दर्ता गराउनुपर्नेछ।
“स्वास्थ्य र मित्रताको लागि खेलकुद” भन्ने मूल नारासहित आयोजना हुन लागेको प्रतियोगिता स्थानीयस्तरमा फुटबल खेलको विकास र सामाजिक एकतामा टेवा पुग्ने आयोजकले विश्वास लिएका छन्।
