इलाम । यातायात व्यवस्था सेवा कार्यालय इलामले आर्थिक वर्ष २०८१/८२ मा लक्ष्यभन्दा बढी राजस्व संकलन गरेको छ । एक वर्षको अवधिमा रु. १३ करोड राजस्व संकलन गर्ने लक्ष्य राखेको सो कार्यालयले रु. १३ करोड ८२ लाख तीन हजार पाँच सय १७ राजस्व संकलन गरेको कार्यालय प्रमुख खगेन्द्रप्रसाद मैनालीले जानकारी दिए ।
कार्यालयले अघिल्लो आर्थिक वर्षभन्दा रु. दुई करोड ४९ लाख ४१ हजार आठ सय ३९ बढी राजस्व संकलन गरेको छ । यो अघिल्लो वर्षको तुलनामा २२ दशमलव ०२ प्रतिशतले वृद्धि हो । कार्यालयले अघिल्लो आर्थिक वर्ष २०८०/८१ मा रु ११ करोड ३२ लाख ६१ हजार छ सय ७८ मात्र राजस्व संकलन गरेको थियो ।
कार्यालयले सवारी साधन वार्षिक करबाट रु. नौ करोड ९६ लाख तीन हजार चार सय ४२ संकलन गरेको छ । सवारी दर्ता/नामसारी/नवीकरणबाट रु. ७२ लाख तीन हजार पाँच सय ५५ संकलन गरेको छ । त्यस्तै, व्यवसाय रजिस्ट्रेशन दर्ता दस्तुरबाट रु एक लाख २८ हजार दुई सय संकलन भएको कार्यालय प्रमुख मैनालीले जानकारी दिए ।
त्यस्तै आयकरबाट रु. ३७ लाख ८५ हजार पाँच सय ९० संकलन गरेको छ । कार्यालयले चालक अनुमति पत्रबाट रु. एक करोड ४३ लाख १७ हजार तीस संकलन गरेको छ । त्यसैगरी नेपाल भारत सीमा क्षेत्र पशुपतिनगरमा स्थापना गरिएको सवारी पटके बाटो इजाजत राजस्व असुली केन्द्रबाट रु. एक करोड छ लाख १७ हजार तीस राजस्व संकलन भएको छ । इलाम सदरमुकामस्थित कार्यालय र पशुपतिनगरबाट रुट पर्मिट र पटकेबाट रु. एक करोड तीस लाख ७२ हजार दुई सय तीस राजस्व संकलन भएको कार्यालयले जनाएको छ ।
कोशी प्रदेश भौतिक पूर्वाधार विकास मन्त्रालयले भारतीय चार चक्के सवारी नेपाल प्रवेश गर्दा रु. पाँच सय १० र मोटरसाइकलको रु. दुई सय १० राजस्व लिने व्यवस्था गरेको थियो । यातायात व्यवस्था सेवा कार्यालयकै मातहतमा रहने गरी अघिल्लो वर्ष पशुपतिनगरमा राजस्व असुली केन्द्र स्थापना भएको थियो ।
यहाँको यातायात व्यवस्था सेवा कार्यालयको कार्यक्षेत्र इलामसँगै पूर्वी पहाडी जिल्ला पाँचथर र ताप्लेजुङ भए पनि झापासहितका सेवाग्राहीसमेत सवारी चालक अनुमतिपत्रसम्बन्धी सेवा लिन आउने गरेको कार्यालय प्रमुख मैनालीले बताए ।
