काठमाडौँ- नेपाल कम्युनिस्ट पार्टी (एमाले)ले आसन्न विधान महाधिवेशनमा प्रस्तुत गरिने विधान संशोधनको प्रस्तावबारे यही साउनभित्र सुझाव दिन मातहतका कमिटी र जनसंगठनलाई निर्देशन दिएको छ ।
एमालेको यही साउन ५ र ६ गते सम्पन्न केन्द्रीय कमिटीको नवौँ बैठकको निर्णयका आधारमा तयार भएको विधान संशोधनको प्रस्तावमाथि लिखित सुझाव माग गरेको हो ।
बैठकको निर्णयपछि अध्यक्ष केपी शर्मा ओलीले अन्तर पार्टी निर्देशन-१२ मा आगामी भदौ २०-२२ गते ललितपुरको गोदावरीमा हुने दोस्रो विधान महाधिवेशनमा प्रस्तुत हुने विधान संशोधन प्रस्तावमा तल्ला कमिटीका सुझाव माग गरिएको हो ।
केन्द्रीय कमिटीको निर्णय कार्यान्वयन र विधान महाधिवेशनको तयारीका सन्दर्भमा एमालेका २३ जनसंगठनका इन्चार्ज, अध्यक्ष र महासचिवलाई शनिबार आयोजित छलफलमा पार्टी नेतृत्वले आफ्नो जनसंगठनको सचिवालय बैठक गरी विधानबारे सुझाव तयार गर्न निर्देशन दिएको हो ।
जनसंगठन संयन्त्रका संयोजक भानुभक्त ढकालले केन्द्रीय कमिटीको निर्णय, सर्कुलर र विधान महाधिवेशनको तयारीका लागि सबै सङ्गठनमा एकरूप बुझाइका लागि पार्टीका अध्यक्ष एवं प्रधानमन्त्री ओलीको उपस्थितिमा भएको बैठकले नीति र नेतृत्वका पक्षमा लाग्दै मिसन-२०८४ सफल तुल्याउन आग्रह गरिएको जानकारी दिए । सो अवसरमा अध्यक्ष ओलीले पार्टीभित्र सम्बन्धित कमिटीका पर्याप्त छलफल गर्न पाइने तर निर्णय भएको कुरा कार्यान्वयनमा कुनै कमजोरी हुन नहुने स्पष्ट गर्दै अनुशासनको पालनमा जोड दिए ।
“सबै जनसंगठन पार्टीका अवयव हुन् । आफ्ना क्षेत्रमा जनआकर्षण बढाउने र सङ्गठन विस्तार गर्न यी सङ्गठन लाग्नुपर्छ । मिसन-२०८४ लाई सफल बनाउँदै एमालेलाई निर्णायक राष्ट्रिय शक्ति बनाउन लाग्नुपर्छ”, अध्यक्ष ओलीले भने, “हाम्रो जनसङ्गठन पार्टीको अहित र विपक्षमा जान सक्दैन । पार्टीको विरोध गर्ने सदस्य पार्टीको कार्यकर्ता होइन । व्यक्तिहरू स्वतन्त्र हुन्छन् तर संगठनमा लागिसकेपछि कुन अधिकार कुन ठाउँमा प्रयोग गर्ने भन्ने बुझेर प्रयोग गर्नुपर्ने हुन्छ । अब हामी आन्तरिक मामिलामा नअल्मलिउँ । विरोधीको सामना गरेर निर्णायक राष्ट्रिय शक्ति बन्न लागौँ ।”
अध्यक्ष ओलीले संविधानको रक्षक र पालक तथा नेपाली सेनाको परमाधिपति भइसकेका पूर्व राष्ट्रपति विद्यादेवी भण्डारीलाई पार्टीको राजनीतिमा फर्कन नहुने पार्टीको बैठकले निर्णय गरिसकेकाले यस विषयमा अब बहस गर्नु निरर्थक हुने बताए ।
