काठमाडौं– सन् २०२५ को जुलाई महिनामा नेपालले कुल ७० हजार १ सय ९३ जना अन्तर्राष्ट्रिय पर्यटकलाई स्वागत गरेको छ । यो सङ्ख्या अघिल्लो वर्षको जुलाई महिनाको तुलनामा ८.७ प्रतिशतले बढी हो ।
नेपाल पर्यटन बोर्डका अनुसार, महामारीपूर्वको अवस्था सन् २०१९ को अप्रिल महिनासँग तुलना गर्दा जुलाई २०२५ मा नेपालले पर्यटक आगमनमा ९९ प्रतिशत प्रगति गरेको छ । योसँगै कोभिडपछिको अवरुद्ध पर्यटन क्षेत्र पुनः लयमा आएको छ ।
सन् २०२५ को जनवरीदेखि जुलाईसम्मको पहिलो सात महिनामा नेपालमा कुल ६ लाख ४७ हजार ८ सय ८२ जना अन्तर्राष्ट्रिय पर्यटकको आगमन भएको छ । यो कोरोना महामारीपछिको उच्चतम आगमन हो ।
नेपाल पर्यटन बोर्डका प्रमुख कार्यकारी अधिकृत दीपकराज जोशीले यो सङ्ख्याले नेपालको पर्यटन पुनरुत्थान र विश्वभर फेरि एकचोटि लोकप्रिय गन्तव्यका रूपमा स्थापित हुँदै गएको देखाएको बताए ।
जुलाईमा कुल आगमनमध्ये सबैभन्दा बढी भारतबाट मात्रै २७ हजार १ सय ५२ जना अर्थात् ३८.७ प्रतिशत पर्यटक आएका छन् ।
यस्तै, चीनबाट ६ हजार ८ सय ९० जना, अमेरिकाबाट ६ हजार ६ सय २६, बंगलादेशबाट ४ हजार ४ सय १३ र बेलायतबाट ३ हजार ५ सय ४७ जना पर्यटक नेपाल आएका छन् ।
क्षेत्रीय विश्लेषण गर्दा दक्षिण एशियाली मुलुकहरूबाट सबैभन्दा बढी ३३ हजार ७ सय ८७ जना, अन्य एशियाली मुलुकहरूबाट १३ हजार ५२, युरोपबाट ९ हजार २९२, अमेरिकाबाट १२ हजार ७७५, ओसिनिया क्षेत्रबाट १ हजार ८ सय ७, मध्यपूर्वबाट ८२६ जना, अफ्रिकाबाट ३१८, र अन्य क्षेत्रबाट ३ हजार ३ सय २९ जना पर्यटकको आगमन भएको छ ।
बोर्डका सीईओ जोशीले भिजिट नेपाल दशकअन्तर्गत सञ्चालन भइरहेका प्रवर्द्धनात्मक कार्यक्रम, निजी क्षेत्रको लगानी प्रवाह, र विविध पर्यटकीय उत्पादनहरूले पछिल्लो समय नेपालमा पर्यटक आकर्षण बढेको जानकारी दिए ।
