काठमाडौं- प्रमुख सत्तारूढ नेकपा एमालेमा वरिष्ठ उपाध्यक्ष पदसँगै ७० वर्षे उमेर हद र २ कार्यकालको व्यवस्थता हटाउने प्रस्ताव गरिएको छ।
बिहीबार पार्टी केन्द्रीय कार्यालय च्यासलमा बसेको सचिवालय बैठकमा उपाध्यक्ष विष्णुप्रसाद पौडेलले गरेको विधान संशोधन प्रस्तावमा उक्त कुरा उल्लेख गरिएको छ।
बैठकमा हाल रहेको १९ सदस्यीय पदाधिकारीबाट घटाएर ११ सदस्यीय कायम गर्ने प्रस्ताव पनि अघि बढेको छ ।
अहिले एमालेमा रहेका १९ जना पदाधिकारीलाई घटाएर ११ जना मात्रै राख्ने गरि विधान संशोधन प्रस्ताव उपाध्यक्ष पौडेलले बैठकमा राखेका एकजना पदाधिकारीले बताएका छन् ।
तर पदाधिकारीको संख्या कटौतीको प्रस्तावलाई लिएर बैठकमा सहभागी वरिष्ठ उपाध्यक्ष ईश्वर पोखरेल लगायत सचिवालय सदस्यहरूले फरक मत राखेका छन्।
ठूलो पार्टीमा पदाधिकारी घटाउँदा नेताहरूको जिम्मेवारी मिलाउन समस्या पर्न सक्ने उनीहरूको धारणा थियो । त्यहीकारण दिउँसो २ बजेदेखि बसेको बैठक अहिले पनि चलिरहेको छ। बैठक लम्बिएपछि नेताहरूलाई खाजा समय भनेर विश्राम दिइएको थियो ।
विधान संशोधन प्रस्ताव र २ वर्षे कार्यकाल हटाउँदा सबैभन्दा सजिलो अध्यक्ष केपी शर्मा ओलीलाई हुनेछ । उनी काठमाडौंमा भएको नवौँ र चितवनमा भएको दशौँ महाधिवेशनबाट दुई कार्यकाल अध्यक्ष भइसकेका छन् ।
उता ७० उमेर हद हटाउँदा पनि उनैलाई फाइदा हुने देखिएको छ। उनी अहिले ७४ वर्ष पुगिसकेका छन्। ओलीले ७० वर्षे हटाउने कुरा यसअघि नै गरिसकेका थिए ।
