काठमाडौं । जलविद्युत विकासका निम्ति ऊर्जा संकटकाल घोषणा गर्न निजी क्षेत्रले माग गरेको छ । १० वर्षमा २८ हजार ५०० मेगावाट विद्युत् उत्पादन गर्ने भए ऊर्जा संकटकाल लगाउनु पर्नेमा निजी क्षेत्रले जोड दिएको छ ।
आज (मंगलबार) राजधानीमा स्वतन्त्र ऊर्जा उत्पादकको संस्था, नेपाल (इप्पान) को २३ औं वार्षिक साधारणसभामा अध्यक्ष गणेश कार्कीले नेपालको समृद्धिको एक मात्र क्षेत्र जलविद्युत भएको बताए ।यसनिम्ति सरकार गम्भीर हुनुपर्ने उनले उल्लेख गरे ।
कार्कीले ऊर्जा क्षेत्रमा निजी क्षेत्रको योगदान, अवसर, चुनौती र समाधानका उपाय प्रस्तुत गर्दै सरकारसँग ठोस पहलको माग गरे । उनले निजी क्षेत्रको सक्रियताले मुलुक लोडसेडिङमुक्त बनेको स्मरण गरे ।
जलविद्युतु विकासलाई रोकिरहेका कानुनी, संरचनात्मक र नीतिगत अवरोध हटाउन तत्काल ऊर्जा संकटकाल घोषणा गर्नुपर्ने उनले धारणा राखे ।
उनका अनुसार, हाल देशको विद्युत् उत्पादन ३६ सय मेगावाट जति छ । तर, अध्ययन अनुसार नेपालको कुल जलविद्युत् उत्पादन क्षमता दुई लाख मेगावाटभन्दा बढी रहेको उनले बताए ।हाल उत्पादित विद्युतको ८१ प्रतिशत निजी क्षेत्रबाट छ ।
