काठमाडौं– जनता समाजवादी पार्टी, नेपालका अध्यक्ष उपेन्द्र यादवले आफ्ना हक अधिकार प्राप्तिका लागि उत्पीडनमा परेका समुदायहरू एक हुनुपर्ने बताएका छन् ।
दलित, पिछडा वर्ग, थारु, मुस्लिम, आदिवासी र अल्पसङ्ख्यक समुदायको केन्द्रीय परिसंघले शनिबार काठमाडौंमा आयोजना गरेको कार्यक्रममा यादवले उत्पीडनमा परेका समुदायहरू एक भएर अघि बढ्न नसके भेदभावको अन्त्य हुन नसक्ने बताएका हुन् ।
फुटाउने र राज्य गर्ने नीति चलिरहने र आफूहरू एक आपसमा लडिरहने प्रवृत्तिले प्राप्त भएका उपलब्धि समेत टिकाउन नसकिने उनले बताए ।
अध्यक्ष यादवले पहिचानको मान्य सबै समुदायले पाउनुपर्ने धारणा राखे । प्रदेशको संरचना पहिचानका आधार नभएकाले अहिले निर्माण गरेको सात वटा प्रदेश काम नलाग्ने उनले बताए ।
अध्यक्ष यादवले सबैभन्दा पछि परेकाहरूको छुट्टै निर्वाचन क्षेत्र बनाउनुपर्ने र सेवाको अवसर तथा विकासका लगानीमा सबैभन्दा पछि परेका समुदायबाट सुरु गर्नुपर्नेमा जोड दिए ।
उनले अहिलेको निर्वाचन प्रणालीले सबैको प्रतिनिधित्व हुन नसक्ने भएकाले त्यसका लागि पूर्ण समानुपातिक निर्वाचन प्रणालीको व्यवस्था हुनुपर्ने धारणा राखे ।
