काठमाडौं– सिन्धुली जिल्लाको गोलन्जोर गाउँपालिका वडा नम्बर ६ मा बस्ने हायु परिवारका १६ जनाको रहस्यमय गुमनामी भएको छ। उनीहरु आइतबार रातिदेखि बेपत्ता छन्।
घटना रहस्यमय देखिएकाले खोजी गर्न समस्या भइरहेको वडाध्यक्ष रविन श्रेष्ठले जानकारी दिएका छन्। चार दिनअघि मात्र उनीहरुले सिमान्तकृत परिवारको भत्ता ८ लाख बुझेका थिए।
उक्त भत्ता सबै जनाको रहेको थियो।
वडाध्यक्ष श्रेष्ठले सोमबार बिहान ११ बजेतिरमात्र सो घटनाबारे थाहा भएपछि प्रहरीसहित उर्मिला हायुको घरमा पुग्दा रहस्यात्मक घटनाहरु देखिएको बताए।
घर हल्का जलेको अवस्थामा र दुई किलो सुँगुरको मासु समेत फेला परे पनि परिवारका सदस्य फेला परेका छैनन्।
‘उर्मिला माझीको श्रीमान् गत वर्ष बित्नुभएको थियो। उहाँको जेठो छोरा वैदेशिक रोजगारीबाट हालैमात्र घर फर्किएको मैले थाहा पाएँ।
चार दिनअघि बैठकबाट सामाजिक सुरक्षा भत्ता एकमुष्ट बुझेर लगेका थिए’ वडाध्यक्ष श्रेष्ठले भनेका छन्।
उर्मिलाको छोरा, बुहारी, नाति नातिना, छोरीहरूसहित एकै परिवारका १६ जना सदस्य बेपत्ता छन्। यो परिवारको घर अन्य बस्तीभन्दा १५ मिनेट पैदलयात्रा हिँडेपछि मात्र पुगिन्छ।
परिवारका सदस्य कहिलेदेखि बेपत्ता भएका हुन् भन्ने विषयमा पनि बुझ्ने क्रम जारी रहेको बताइन्छ।
