काठमाडौँ । नेपाल पर्यटन बोर्डले पर्यटकहरूको सहजताका लागि नि:शुल्क शटल बस सेवा सञ्चालनमा ल्याएको छ ।
देशका विभिन्न स्थानमा देखिएको सार्वजनिक सवारीसाधन अवरोध, हडताल र यातायात सेवा अवरुद्ध भएकाले त्रिभुवन अन्तर्राष्ट्रिय विमानस्थलको आगमन कक्षबाहिरदेखि काठमाडौँका प्रमुख होटेलहरूसम्म आउने पर्यटकहरूलाई नि:शुल्क यात्राको सुविधा उपलब्ध गराइएको हो ।
बोर्डले आगामी दिनहरूमा पनि यस्ता सहज, व्यवस्थित र पर्यटकमैत्री सेवाहरू थप विस्तार गर्दै जाने जनाएको छ । नेपाल पर्यटन बोर्डले यो पहल स्वदेश आउने पर्यटकलाई स्वागतजनक अनुभूति दिन र उनीहरूको पहिलो यात्रालाई सहज बनाउनका लागि सुरु गरेको जनाएको छ ।
