फिदिम- नेपाली काँग्रेसका नेता डा. शेखर कोइरालाले पार्टीका कार्यकर्ताले नेताको झोला बोकेर मात्र नहुने बरु स्वाभिमानी भएर सक्षम नेतृत्वको रूपमा स्थापित हुनुपर्ने बताएका छन्। पाँचथरको फालेलुङ गाउँपालिकामा आयोजित आमसभा र पार्टी प्रवेश कार्यक्रमलाई सम्बोधन गर्न पुगेका कोइरालाले यस्तो धारणा राखेका हुन्।
“नेपाली काँग्रेसका कार्यकर्ताले नेताको झोला बोकेर वा पछिपछि कुदेर मात्र पुग्दैन,” कोइरालाले भने, “कार्यकर्ता स्वाभिमानी बन्नुपर्छ र आफूलाई सक्षम नेतृत्वको रूपमा स्थापित गर्नुपर्छ। नेताको मन जित्ने होइन, जनताको मन जित्ने काम गर्नुपर्छ।”
आइतबार नेकपा एमाले बागमती प्रदेश कमिटीको कार्यक्रममा प्रधानमन्त्री ओलीले जेठ १५ गते काठमाडौं ‘कब्जा’ गर्न कार्यकर्तालाई निर्देशन दिएका थिए। सोही दिन राजावादीहरूले पनि काठमाडौंकेन्द्रित आन्दोलनको घोषणा गरेका छन्। कोइरालाले यस्ता गतिविधिका कारण देश मुठभेडतर्फ उन्मुख भएको ठहर गरे।
