काठमाडौं । सत्तारुढ दल नेपाली कांग्रेसका सांसदले ‘हुन्छ’ र ‘हुन्न’को प्रक्रियाले लोकतान्त्रिक प्रक्रियालाई गायब बनाउन खोजेको टिप्पणी गरेका छन् ।
प्रतिनिधिसभाको बिहीबार बसेको बैठकमा सरकारको नीति तथा कार्यक्रममाथि बोल्दै सांसद अर्जुननरसिंह केसीले यस्तो टिप्पणी गरेका हुन् ।
‘हुन्छ र हुन्नको बीचमा सत्य, न्याय र लोकतान्त्रिक प्रक्रियाहरू गायब हुन थालेका छन्,’ उनले भने, हुन्छ र हुन्न मात्रै नभनेर विधि र प्रक्रिया अनुसार आएका सुझाव समेटेर सरकार अगाडि बढ्नुपर्छ ।’
हुन्छ र हुन्नको बीचमा पनि सत्य निरुपण गर्न सकिन्छ भन्दै उनले विवेकबाट कुनै एउटा सत्यको बाटो निकाल्न सकिने जिकिर गरे ।
लोकतन्त्र भनेकै वाद, प्रतिवाद र संवादको प्रक्रिया भएकाले यो प्रक्रियालाई अवलम्बन गरेर आएको सत्यलाई अगाडि बढाउनु पर्ने उनको भनाइ छ ।
विचारको विविधताको घर्षणबाट निस्किने सुन्दर पक्ष नै लोकतन्त्र रहेको उल्लेख गर्दै उनले यस्तो अभ्यास कम हुँदै गएकोमा चिन्ता व्यक्त गरे ।
‘तर, जो सत्तामा छ त्यसले सबै आफूले गरेको ठीक भन्ने, जो प्रतिपक्षमा छ उसले गरेको सरकारले गरेको सबै बेठकी भन्ने प्रवृति गलत छ,’ उनले भने ।
यही शैलीले संसद्मा हुन्छ र हुन्नको प्रवृतिको जन्म भएको उनको ब्याख्या छ, ‘यो हुन्छ र हुन्नको गतिले राष्ट्रको प्रगति जुन ढंगले विकसित भएको छ त्यसलाई नयाँ गति दिन सक्दैन ।’
नागरिक हितका लागि प्राप्त सुझाव समेटेर जाने वातावरण आवश्यक रहेको उनले बताए । उचित राय सबैको सुनिने वातावरण बन्नुपर्ने उनको आग्रह छ । अन्यथा, हुन्छ र हुन्नको गतिलाई निरन्तरता दिए लोकतान्त्रिक प्रक्रियाले निरन्तरता सही रुपमा पाएको नमानिने उनको बुझाइरहेको छ ।
बैठकमा उनले समाजमा देखिएको निराशा लोकतन्त्रप्रतिको निराशा नरहेको बताए । निराशा विधिसँग जोडिएको उनको भनाइ छ ।
‘अहिले जुन निराशा देखिएको छ । त्यो निराशा लोकतान्त्रिक व्यवस्थाको विरोधमा होइन । हामीले गरेका दण्डविहीनता, विधिविहीनता, पक्षपात र सुशासनको सट्टा कुशासनको शृंखलावद्ध घटनाहरू भयो,’ उनले भने । यस्तो कार्य वर्तमान सरकारले मात्रै गरेको भन्ने आफ्नो आरोप नरहेको उनले बताए ।
पछिल्ला सरकारका गतिविधिहरूका कारण नागरिकमा निराशा रहेको र सडकमा जो आए पनि त्यसलाई साथ दिने अवस्था बन्न पुगेको उनले बताए । यसको कारण दण्डहीनता र विधिहीनता नै रहेको उनको टिप्पणी छ ।
‘जो सत्तामा बस्यो उसमा म मात्रै ठीक भन्ने मनोविज्ञान रहेको छ । यसले नागरिकमा निराशा बढाउने काम गरेको छ’ सांसद केसीले भने ।
