पोखरा । सर्वसाधारण नागरिक (यात्रु) लाई जबरजस्ती गाडीमा राख्नको लागि तानातान गर्ने र उनीहरूको झोला लगायतका सामानहरू खोस्ने दुई जना बिचौलियालाई कास्की प्रहरीले पक्राउ गरेको छ ।
पोखराको पृथ्वीचोक बसपार्कमा यात्रु खोसाखोस गरेको आरोपमा आज दुई जनालाई पक्राउ गरिएको कास्की प्रहरी प्रवक्ता डिएसपी श्रवण कुमार वि.क. ले बताए ।
पक्राउ पर्नेमा तनहुँ ब्यास नगरपालिका-१४ घर भई हाल पृथ्वीचोक बस्ने वर्ष २४ को मन्जित महरा र रौतहट गौर नगरपालिका घर भई हाल पोखरा मियापाटन बस्ने वर्ष २४ को अमर शाह रहेका छन् ।
प्रहरीका अनुसार पक्राउ परेका दुई जना बिचौलिया हुन् । उनीहरूले यात्रु राखेबापत सहचालकबाट केही रकम कमिसन स्वरूप लिने गर्दछन् ।
यात्रुहरूले जिल्ला प्रशासन कार्यालयमा यसबारेमा गुनासो गरेपछि प्रहरी केही समयदेखि त्यस क्षेत्रमा अनुगमन गरिरहेको थियो ।
अनुगमनको क्रममा उनीहरूले सर्वसाधारण यात्रुहरूलाई जबरजस्ती आफू अनुकूलको सवारी साधनमा चढाउने तथा निजहरूको इच्छा विपरीत जबरजस्ती गरी झोला समेत खोसाखोस गर्ने गरेको पाइएपछि पक्राउ गरिएको हो ।
यात्रुलाई दुःख हैरानी दिँदै अभद्र व्यवहार गरेको आरोपमा पक्राउ परेका दुवैउपर अभद्र व्यवहार सम्बन्धी मुद्दामा थप अनुसन्धान प्रक्रिया अगाडी बढाइएको कास्की प्रहरीले जारी गरेको सूचनामा उल्लेख छ ।
