काठमाडौं । वैदेशिक रोजगारीको लागि साइप्रस पठाइदिने भन्दै ठगी गरेको आरोपमा प्रहरीले एक महिलालाई पक्राउ गरेको छ ।
पक्राउ पर्नेमा उदयपुर बेलका नगरपालिका-५ घर भई हाल ललितपुर महानगर- १२ मंगलबजार बस्ने बर्ष ३२ की चेतना श्रेष्ठ रहेकी छन् ।
उनले राधेश्याम वानियालाई वैदेशिक रोजगारीको लागि साइप्रस पठाईदिने त्यसको लागत रु. पन्ध्र लाख पैसठ्ठी हजार रुपैयाँ लाग्ने बताएकी थिइन् ।
त्यहाँ पुगेपछि कृषि फार्ममा मासिक डेढ लाख रुपैयाँ भन्दा बढी तलब हुने काममा लगाइदिने भन्दै प्रलोभनमा पारेर बानियाबाट साढे सात लाख रुपैयाँ लिएपछि सम्पर्कबिहीन भएकी थिइन् ।
साइप्रस जाने आशामा रहेका बानिया आफू ठगिएको थाहा पाएपछि वैदेशिक रोजगार विभागमा श्रेष्ठविरुद्ध उजुरी दिएका थिए ।
विभागले काठमाडौं उपत्यका अपराध अनुसन्धान कार्यालयलाई पत्र लेख्दै श्रेष्ठको खोजतलास गरेर उपस्थित गराइदिन अनुरोध गरेको थियो ।
विभागको पत्रपछि कार्यालयबाट खटिएको प्रहरी टोलीले ती महिलाई हिजो (शुक्रबार) दिउँसो ललितपुरको मंगलबजारबाट पक्राउ गरेको कार्यालयका प्रवक्ता प्रहरी उपरीक्षक (एसपी) रविन्द्र रेग्मीले बताए ।
उनलाई थप अनुसन्धान तथा कारवाहीको लागि वैदेशिक रोजगार विभाग ताहाचल, काठमाडौँ पठाईएको एसपी रेग्मीले जानकारी दिए ।
