काठमाडौं । नेपाली कांग्रेसका उपसभापति पूर्णबहादुर खड्काले सत्तारुढ दलका बीचमा मन्त्रालयको भागबण्डा नटुंगिएको बताएका छन् । आइतबार संघीय संसद् भवन नयाँ बानेश्वरमा सञ्चारकर्मीसँग कुराकानी गर्दै उपसभापति खड्काले मन्त्रालय भागबन्डाको विषय नटुंगिएको बताए ।
उनले गठबन्धन दलका नेताका बीचमा छलफल भइरहेको भए पनि कुन पार्टीले कुन मन्त्रालय भन्नेमा टुंगो नलागेको जनाए । उनले नेपाली कांग्रेसले पनि कसको नेतृत्वमा सरकारमा जाने र को–को मन्त्री भएर जाने भन्नेमा निर्णय गरिनसकेको बताए ।
उपसभापति खड्काले भने , “नेपाली कांग्रेसले औपचारिक रुपमा कुनै निर्णय गरेको छैन। नेपाली कांग्रेस मात्रै होइन कुनै पनि दलले कुन मन्त्रालय लिएर सहभागी हुने भन्ने बारेमा अन्तिम निर्णय भइसकेको छैन। अहिले सबैकुरा छलफलको क्रममा छ। छलफल घनिभूत रुपमा प्रधानमन्त्रीले समन्वय गरेर गरिरहनुभएको छ। गठबन्धन दलका नेतासँग पनि छलफल भइराखेको छ। अहिलेसम्म कुन पार्टीले कुन मन्त्रालयमा सहभागी हुने भन्ने कुरा टुंगो लागेको छैन। नेपाली कांग्रेस पार्टीको तर्फबाट औपचारिक रुपमा को–को जाने, कसले नेतृत्व गर्ने भन्ने बारेमा औपचारिक निर्णय भइसकेको छैन।”
उनले आगामी तीन दिन भित्रमा सरकारले पूर्णता पाउने दाबी गरे । प्रधानमन्त्री पुष्पकमल दाहाल ‘प्रचण्ड’ले सबै दलसँग संवाद गरिरहेको भन्दै तीन दिनभित्रमा सरकारले पूर्णता पाउने बताए ।
उनले भने, “गठबन्धनको बैठक प्रत्येक दिन बसिराखेको छ। कहिले सबै दलका नेताहरु बस्नुहुन्छ। कहिले त्यसमध्येका केही नेताहरु बस्नुहुन्छ। कहिले प्रधानमन्त्रीले गठबन्धनसँग जोडिएका विश्वासको मत दिने दल र त्यो विश्वासका मत दिँदा गठबन्धनमा छौँ भन्ने दलहरुका बीचमा प्रधानमन्त्रीले संवाद गरिरहनुभएको छ। सहमतिमा, सबैको सहभागिता, सबैको उचित प्रतिनिधित्व हुने गरी हामी सहमतिको आधारमा यो कुरालाई टुंग्याउँछौँ।”
उपसभापति खड्काले हालसम्म भइरहेको छलफलमा सरकार विस्तारको सम्बन्धमा कसैको असहमति नभएको उल्लेख गरे । सबैको सहभागिता र उचित प्रतिनिधित्व हुनेगरी सबैको सहमतिमा सरकारलाई पूर्णता दिइने उनको भनाइ छ।