काठमाडौँ । ट्याक्सीमा छुटेको आइफोन ट्राफिक प्रहरीको सक्रियतामा सम्बन्धित धनीलाई फिर्ता गरिएको छ ।
अघिल्लो सोमबार (चैत ६ गते) बेलुका थापाथलीस्थित नर्भिक अस्पतालबाट कीर्तिपुर जाने क्रममा बा १ ज ७३४६ नम्बरको भाडाकारमा अञ्जना विश्वकर्माको आइफोन १२ प्रो म्याक्स छुटेको थियो ।
उनले फोन हराएपछि काठमाडौँ उपत्यका ट्राफिक कार्यालयमा निवेदन दिएपछि प्रहरीले सिसिटिभीको सहायतामा सम्बन्धित ट्याक्सी नम्बर पत्ता लगाएर चालकसँग सम्पर्क गरेको थियो ।
ट्याक्सी चालकले उक्त फोन सुरक्षित आफूसँग रहेको बताएपछि ट्राफिक कार्यालय रामशाहपथमा उक्त फोन सम्बन्धित धनीलाई फिर्ता गरिएको हो ।
ट्राफिक प्रहरीले यात्राको क्रममा आफ्नो सामानहरू छुटेको खण्डमा प्रहरीमा निवेदन दिन अनुरोध गर्दै आइरहेको छ ।