काठमाडौँ। सरकारले रासायनिक मलमा दिँदै आएको अनुदानमा भारी मूल्यमा कटौती गर्ने निर्णयप्रति राप्रपा निकट किसान संगठन, राष्ट्रिय प्रजातान्त्रिक किसान संगठनले आज काठमाडौँको माइतीघरमा प्रदर्शन गरेको छ ।
यही फागुन २६ गतेको कृषि तथा पशुपन्छी मन्त्रालयको विभागीय मन्त्रीस्तरको बैठकले रासायनिक मलमा दिँदै आएको अनुदान कटौती गर्ने निर्णय गरेपछि उनीहरू विरोधमा उत्रिएका हुन् ।
सरकारले रासायनिक मलमा किसानलाई दिँदै आएको अनुदान समग्रमा ११.८ प्रतिशतले घटाएको छ । मल खरिदमा अरबौं रकम खर्च भएपनि सोही अनुपातमा परिमाण बढाउन नसकेपछि सरकारले समग्र अनुदान ११.८ प्रतिशतले घटाएको हो ।
हाल रासायनिक मलमा सरकारले ८० प्रतिशतसम्म अनुदान दिँदै आएको छ । आयात बिन्दुमा युरिया प्रतिकिलो १४ रुपैयाँ, डीएपी ४३ रुपैयाँ र पोटास प्रतिकिलो ३१ रुपैयाँ बिक्री प्रयोजनको लागि तोकिएको कृषि तथा पशुपन्छी विकास मन्त्रालयले जनाएको छ । यो रकम खरिद मूल्यको आधारमा युरियामा ८० प्रतिशत, डीएपीमा ५९.०४ र पोटासमा ५८.२ प्रतिशत अनुदान हो ।
प्रदर्शनमा राष्ट्रिय प्रजातान्त्रिक किसान संगठनका केन्द्रीय अध्यक्ष राममणि न्यौपाने, राप्रपा काठमाडौँ जिल्ला अध्यक्ष नवराज सिम्खडा सहितका नेता कार्यकर्ताहरूको उपस्थिति रहेको छ ।
सरकारद्वारा गरिएको यस प्रकारको किसान मारा निर्णयले कृषि प्रधान देशको कृषि विकासमा अवरोध पुग्ने उनीहरूको आरोप छ । प्रदर्शनमा उनीहरूले सरकारी विरोधी नारा लगाउनुका साथै तत्काल निर्णय फिर्ता लिई समयमै किसानलाई मल बीउ उपलब्ध गराउन सरकारलाई आग्रह गरेका छन् ।
नयाँ मूल्य अनुसार किसानलाई युरिया प्रतिकिलो २५ रुपैयाँ, डिएपी ५० रुपैयाँ, पोटास ४० रुपैयाँ पर्नेछ ।
थप तस्बिरहरू