सालझण्डी (रुपन्देही) । रुपन्देहीको सैनामैनामा १४ वर्षीय एक किशोरीलाई झारफुक गर्ने बहानामा कुटपिट गरी हत्या गर्ने महिला (माता) लाई प्रहरीले पक्राउ गरेको छ ।
जिल्लाको सैनामैना नगरपालिका–१० झिमझिमे बस्ने १४ वर्षीया सीता ज्ञवालीलाई स्थानीय झाँक्री महिला २२ वर्षीया सोनिया रेश्मीले शनिबार झारफुक गर्ने बहानामा कुटपिट गर्दा मृत्यु भएको थियो ।
कुटपिटबाट मृत्यु भएकी किशोरीको सोही राति नै दाहसंस्कार गरी सकिएको भन्ने सूचनाका आधारमा इलाका प्रहरी कार्यालय सालझण्डी रुपन्देहीबाट खटिएको प्रहरी टोलीले अभियुक्त झाँक्री सोनियालाई पक्राउ गरेको छ ।
उनीमाथि आवश्यक अनुसन्धानपश्चात् रुपन्देही जिल्ला अदालत रुपन्देहीबाट सात दिन म्याद थप अनुमति लिई थप अनुसन्धान कार्य भइरहेको जिल्ला प्रहरी कार्यालय रुपन्देहीका सूचना अधिकारी प्रहरी नायब उपरीक्षक श्यामु अर्यालले जानकारी दिनुभयो ।
फेसबुक भिडिओबाट घटना सार्वजनिक
सामाजिक सञ्जाल फेसबुकमामा फाल्गुन २१ गते एक महिलाले झारफुक गरी बिरामीलाई सन्चो बनाउछु भन्दै एक बालिकालाई भुईमा लडाई घोप्टो पारी बालिकाको शरिर माथि चढी (बसी) हातमा घण्टी बजाउदै गालामा थप्पड हान्ने रुद्राक्षको मालाले शरिरको बिभिन्न भागमा हान्ने, भुईमा लडाउने, टाउको र घाँटीमा खुट्टाले टेक्ने, पटक पटक जगले नाक मुखमा पानी खन्याउने, कपालमा समाई टाउको बटारी दिने, कपालमा समाई अनुहारको भागमा थुक्ने, खरानी खुवाईदिने र लछारपछार पारी कुटपिट समेत गरेको भिडियो प्रकाशन भएको फेला परेको थियो ।
त्यसपश्चात तत्काल उक्त झारफुक गरी सन्चो गराउछु भन्ने महिला र पिडित बालिकाको सम्बन्धमा अनुसन्धान गरी बुझ्दै जाँदा उक्त झारफुक गरी सन्चो गराउछु भन्दै कुटपिट गर्ने महिला जिल्ला रुपन्देही सैनामैना नगरपालिका वडा नं. १० बस्ने बर्ष २२ की माता भन्ने सोनिया रेश्मी र पिडित बालिका जिल्ला रुपन्देही सैनामैना नगरपालिका वडा नं. १० बस्ने बर्ष १४ की सिता ज्ञवाली रहेको अनुसन्धानबाट खुल्न आएको इलाका प्रहरी कार्यालय सालझण्डिका प्रहरी निरीक्षक जगन्नाथ मरासिनीले बताए।