काठमाडौं । रुपन्देहीको बुटवल उपमहानगरपालिका-६ दुर्गा मन्दिर लाइनकी ७० वर्षीया शारदा पाण्डे अहिले दुवै मृगौला फेल भएर मृत्युसँग जुधिरहेकी छन्। केही दिनअघि मात्र अस्पतालबाट घर फर्किएकी उनी हाल अक्सिजनको सहायतामा बाँचिरहेकी छन् भन्दा फरक नपर्ला!
उनी ठिकसँग उठेर यताउती हिँड्न सक्दिनन्। दिसा-पिसाब पनि ओछ्यानमै हुन्छ। तर बाध्यता, आफ्नै छोराले सम्पत्तिमा झिकेको किचलोका कारण शारदा आफ्ना श्रीमान् उमानन्द पाण्डेको साथ लागेर अदालत जानुपर्छ।
उमानन्द उमेरले ७७ वर्ष लागे। सम्पत्तिकै किचलोले गर्दा उनी पनि चकलेटसरह औषधि खान बाध्य छन्। ‘म अशक्त छु, तर पनि सकिनसकी अदालत धाउँदैछु,’ केटिएम दैनिकसँगको कुराकानीमा उमानन्दले भने, ‘के गर्ने मैले दुःखले जोरजाम गरेको सम्पत्तिमा सबैले आँखा गाडेपछि।’
घरनजिकै काठमाडौँ अनन्त मोटर्स फर्म सञ्चालन गर्दै आएका उनी छोरा सन्तोष पाण्डे र उनका साझेदारहरूको ‘चक्रब्युह’ मा परेर अदालत धाउन बाध्य भएका हुन्। कु नियत राखेर जालसाजपूर्वक एक करोड ७६ लाख रुपैयाँको चेक काटेको र उल्टै चेक अनादर गराएर झुटा मुद्दा लगाइएको उमानन्दको दाबी छ।
रुपन्देही जिल्ला अदालतमा गत साउनमा आफू र आफ्नो फर्म विरुद्ध मुद्दा परेपछि उमानन्द तारिख धाइरहेका छन्। ‘निकै गाह्रो भएको छ हामीलाई,’ उनी भन्छन्, ‘शारदाको स्वास्थ्यवस्था गम्भीर छ। आफ्नो सम्पत्तीमा छोरा-बुहारीको कु नियत देखिएपछि हामीले यो उमेरमा अदालत धाउनुपर्ने बाध्यता आएको हो।’
उमानन्दका अनुसार छोरा सन्तोषलाई आफू २० वर्ष देखि ब्लड प्रेसर, मुटु पक्षघात तथा गएको २०७८ मा मात्र एउटा मृगौला फालेकाले त्यस फर्म सञ्चालनको जिम्मा दिएका थिए। त्यही बेला देखि फाइदा लिने जालसाझ पूर्व तरिकाले छोरा बुहारी ले यसो देख भेट गर्ने बहाना बनाएर बुवा र आमा लाई विश्वास पारी त्यस फर्म को २५ थान खाली चेक मा सही गराएर लगेका थिए।
उमानन्दले फर्म सञ्चालनमा कठिनाइ नहोस् भन्दै ती चेकहरू दिए पनि छोरा सन्तोषले कु नियत राखेको उनको दाबी छ। ‘मैले चेक दिएपछि उनीहरूले एकापसमा मिलेर गुपचुप रूपमा मलाई तथा अरू २ भाइ लाई नोक्सान पार्ने नियत राखेछन्,’ उनी भन्छन्,’आफूलाई फाइदा पुग्ने हिसाबले धोका दिएर चेकमा अङ्क र मिति भरेर अनादर गरिएको रहेछ।’
उनका अनुसार छोरा सन्तोष, प्रमोदकुमार भारी, असिम न्यौपाने, सरोजनी पिया मल्लि र विजयकुमार गुप्तालगायत मिलेर एउटा इन्जिनियरिङ फर्म सञ्चालन गर्छन्। चार वर्षदेखि उनीहरूले सञ्चालन गर्दै आएको सो फर्म घाटामा रहेका कारण पनि आफ्नो सम्पत्तिमाथि कु नियत राखिएको हुन सक्ने उमानन्दको शङ्का छ।
काठमाडौँ अनन्त मोटर्स भने २० वर्षयता उमानन्दले नै सञ्चालन गर्दै आएका छन्। बीचमा छोरा सन्तोषले सो कम्पनी आफ्नै नाममा पारेको भए पनि उमानन्दले पुनः आफ्नो नाममा फिर्ता ल्याएका थिए।
अंशबन्डाका क्रममा सम्पत्ति र जग्गामा सन्तोषले असन्तुष्टि जनाएका थिए। सोही असन्तुष्टिलाई लिएर फर्म भित्र पनि किचलो निकाल्दा आफूहरूले मुद्दा नै खेप्नुपर्ने अवस्था आएको बताउँछन्, उनी।
गत जेठतिर उमानन्दले बुटवल-८ का ४९ वर्षीय प्रमोदप्रसाद भारी, असिम न्यौपाने, सरोजनी मल्ली पिया र बिजय गुप्तासँग विभिन्न प्रयोजनमा एकै दिन एकै पटक ठुलो मात्रालाई एक करोड नौ लाख ऋण लिएर रकम नभएको चेक दिइएको भन्दै अदालतमा मुद्दा दायर भएको छ। तर, आफूले अरूबाट कुनै पनि रकम नलिएको र रकम असुल्ने खेल भइरहेको उमानन्द बताउँछन्। उनी थप्छन्, “एकै दिन त्यत्रो पैसा नगद दिन सक्न लाई कहाँ बाट लिएर दिए, चेक लिन सक्ने ले मेरो फर्म वा मेरा नाममा नै किन ‘एसी पे’चेक दिन सकेनन्?” एकै दिन त्यति पैसा झिक्न नेपाल राष्ट्र बैकले ले पनि एकै दिनमा १० लाख भन्दा माथि झिक्न मिल्दैन !
उनले सोहीअनुरूपको प्रत्युत्तर पनि अदालतमा जारी गरेका छन्।
‘यतिसम्म कि मलाई जसले रकम दिएको भनेर मुद्दा हालिएको छ, उनलाई मैले चिनेकोसम्म छैन। मेरा छोराको साथी हुन् कि! सबै जालसाज हुन्, बनावटी हुन्। अझ मैले उनीहरूलाई दिएको भनिएको चेकको मिति प्रमोद भारी, असिम न्यौपाने , सरोजनी मल्ली पिया र बिजय गुप्ता ले पेस गरेको चेकको मिति सबै एकै दिन र चेक को क्रमसङ्ख्या नम्बर पनि लगातार भएकाले छोरासँग मिलेर गुपचुप रूपमा मलाई फसाउन खोजिएको स्पष्ट छ,’ उनले थपे।
यस विषयमा आफूहरूले छोरा सन्तोष र बुहारी रेनुकासँग जानकारी लिन खोज्दा उनीहरूले बुबा-आमालाई नै बरबाद पारिदिने भनेर धम्की दिएको उमानन्दको गुनासो छ। ‘रकम लिने बेलामा आफूहरूसँग सल्लाह गरेनौँ भन्दै उल्टै गालीगलौज गरे,’ उनले भने,’ जेठो छोरो हो। उसैले गरेको गल्तीमा सहजीकरण गरिदेला भनेको दुवै जना मिलेर हामीलाई धम्की दिए।’
