मधेस प्रदेशका मुख्यमन्त्री सरोजकुमार यादवले शुक्रबार मन्त्रिमण्डल विस्तार गरेका छन् । मन्त्रिमण्डलमा छ मन्त्री र तीन राज्यमन्त्रीलाई सामेल गरिएको छ ।
नवनियुक्त मन्त्रीहरूले हिजै पद तथा गोपनीयताको शपथ लिइसकेका छन् । नवनियुक्त छ मन्त्रीले प्रदेश प्रमुख हरिशङ्कर मिश्रबाट र तीन राज्यमन्त्रीले मुख्यमन्त्री यादवबाट पद तथा गोपनीयताको सपथ लिएका हुन् ।
सत्ता गठबन्धन दलमध्येका नेकपा (माओवादी केन्द्र) लाई सरकारमा सहभागी नगराई मुख्यमन्त्री यादवले नेकपा (एमाले), जनता समाजवादी पार्टी (जसपा) र जनमत पार्टीलाई समेटेर मन्त्रिमण्डल विस्तार गरेका हुन् ।
प्रदेश सरकारको छ मन्त्रालयको भागबन्डा गरेर मुख्यमन्त्री यादवले मन्त्रिमण्डल विस्तार गरेका हुन् । मन्त्रालयको भागबन्डामा जसपाबाट सुरिताकुमारी साहलाई सामाजिक विकास र सिङ्गासन सा कलवारलाई खानेपानी तथा ऊर्जा विकास मन्त्रालयको जिम्मेवारी दिइएको छ ।
एमालेबाट राजकुमार लेखीलाई कानून, न्याय तथा प्रदेशसभा मामिलामन्त्री र शत्रुधनप्रसाद सिंहलाई गृह तथा सञ्चार मन्त्रालयको जिम्मेवारी दिइएको छ । मोहम्मद जयद आलमलाई महिला, बालबालिका युवा तथा खेलकुदमन्त्री बनाइएको छ । जनमत पार्टीबाट संसदीय दलका नेता महेशप्रसाद यादवले शिक्षा, विज्ञान प्रविधि तथा वाणिज्य मन्त्रालयको जिम्मेवारी पाएका छन् ।
राज्यमन्त्रीमा जसपाका शेख अबुल कलाम आजादलाई सामाजिक विकास मन्त्रालय, शुक्रबारै एमालेमा प्रवेश गरेका केशव राय चौधरीलाई गृह तथा सञ्चार राज्यमन्त्री र जनमत पार्टीका सञ्जयकुमार यादवलाई भूमि व्यवस्था, कृषि तथा सहकारी मन्त्रालयको राज्यमन्त्रीमा नियुक्त गरिएको छ ।
मुख्यमन्त्री यादवले मुख्यमन्त्री तथा मन्त्रिपरिषद्को कार्यालयसहित उद्योग, पर्यटन तथा वन मन्त्रालय आफैँसँग राखेका छन् । गत पुस २९ गते तीन विनाविभागीय मन्त्रीसहित मन्त्रिपरिषद् गठन गरेका मुख्यमन्त्री यादवले तीन सातापछि मन्त्रिमण्डललाई पूर्णता दिएका हुन् ।