रक्षामन्त्री हरि प्रसाद उप्रेती आज नेपाली सेनाको मुख्यालय जंगी अड्डाको निरीक्षणमा गएका छन् । रक्षामन्त्रीमा नियुक्त भएपश्चात उनी पहिलो पटक जंगी अड्डा पुगेर नेपाली सेनाको बारेमा औपचारिक जानकारी लिएका हुन् ।
जंगी अड्डामा आयोजित विशेष कार्यक्रममा मन्त्री उप्रेती समक्ष नेपाली सेनाको संगठनात्मक स्वरुप, तैनाथी, स्वदेश र अन्तर्राष्ट्रिय क्षेत्रमा नेपाली सेनाले संचालन गरिरहेका विविध गतिविधिहरुको बारे जानकारी गराइएको सैनिक जनसम्पर्क निर्देशनालयले जनाएको छ ।
कार्यक्रममा प्रधान सेनापति प्रभुराम शर्माले रक्षामन्त्रीज्यूलाई बधाई ज्ञापन गर्दै नेपाली सेनाका सकलदर्जाको तर्फबाट जंगी अड्डामा स्वागत गरे । सरकारले नेपाली सेनालाई सुम्पिएका जिम्मेवारी एवं संविधानप्रदत्त दायित्वहरु निर्वाह गर्दा विद्यमान कानूनी प्रावधानहरु पुरा गर्दै अगाडी बढ्नु पर्ने मान्यतामा नेपाली सेना अडिग रहेको उनले प्रष्ट पारे ।
कार्यक्रममा रक्षामन्त्री श्री हरि प्रसाद उप्रेतीले आफ्नो पहिलो जंगी अड्डा भ्रमणको दौरान नेपाली सेनाको बारे उपलब्ध गराएको जानकारीका लागि धन्यवाद ज्ञापन गर्नु हुँदै राष्ट्रिय एकीकरण अभियानको प्रारम्भ देखि नेपालको एकता, अखण्डता, संस्कृति, परम्परा जोगाई राख्न नेपाली सेनाले निर्वाह गर्दै आइरहेको भूमिकाको प्रशंसा गरे ।
उनले अन्तर्राष्ट्रिय शान्ति स्थापना कार्यमा नेपाली सेनाले पुर्याएको योगदानको चर्चा गर्दै हाल संयुक्त राष्ट्रसंघलाई फौज उपलब्ध गराउने देशहरु मध्ये दोश्रो भएतापनि विश्व शान्तिका लागि जोखिम बहन गर्ने एवं साहस प्रदर्शन गर्ने फौजमा नेपाली सेना सधै अग्रपंक्तिमा रहेको र यसबाट आफू अत्यन्तै खुसी हुने गरेको उल्लेख गरे ।
उनले हालै बहुचर्चित राष्ट्रिय गौरवको काठमाण्डौं-तराई/मधेश द्रुतमार्ग आयोजनाको भ्रमण गर्ने क्रममा भैरहेको प्रगति देख्दा आफु सन्तुष्ट भएको बताउँदै आयोजना पुरा गर्ने क्रममा देखा परेका चूनौतीहरुलाई सम्बोधन गर्दै गुणस्तरीय ढंगले, छिटो कार्यसम्पन्न गर्न आफ्नो तर्फबाट सबै किसिमको सहयोग रहने विश्वास दिलाए ।
नेपाली सेनाको समग्र क्षमता अभिवृद्धि तथा संगठनात्मक सुदृढीकरणमा रक्षा मन्त्रालयले सदैव सकारात्मक भूमिका निर्वाह गरिरहने कुरा बताउँदै उच्च हौसला सहित कर्तव्यपथमा समर्पित रहिरहन नेपाली सेनाका सकलदर्जालाई आव्हान गरे ।
कार्यक्रमको आरम्भमा बलाधिकृत रथी श्री सरोज प्रताप राणाले स्वागत मन्तव्य व्यक्त गरेका थिए । त्यस अवसरमा रथीवृन्दका साथै रक्षा मन्त्रालय र नेपाली सेनाका अधिकृतहरुको उपस्थिति
थियो ।