लागु औषध (ब्राउन सुगर) मुद्दामा विगत आठ वर्षदेखि फरार रहेका दुई अभियुक्तलाई रुपन्देही प्रहरीले बुधबार पक्राउ गरेको छ ।
२०७१ साल साउन ३० गते सिद्धार्थनगर-१ बेलहिया स्थित भारतबाट नेपालतर्फ आउने सडकमा ब्राउनसुगर सहित विष्णुदेव थारु र दिनेश थारु पक्राउ परेका थिए ।
पानि परिरहेको समयमा रेनकोट लगाएर भारतबाट नेपालतर्फ आउँदै गरेका ती व्यक्तिको साथबाट तीन पुरीया ब्राउन सुगर भेटिएको थियो । पक्राउ परेका दुईजनाले प्रहरीसामू आफूले भारतको सुनौलीको समिर मेडिकलबाट दुई हजार ४०० रुपैयाँमा ३ पुरिया ब्राउन सुगर किनेर नेपालतर्फ ल्याउँदै गरेको बताएका थिए ।
त्यसपछि जिल्ला प्रहरी कार्यालय रुपन्देहीले उनीहरूविरुद्ध लागु औषध मुद्दा चलाएको थियो । जिल्ला अदालत रुपन्देहीको थुनछेक बहसको आदेशले तीस हजार रुपैयाँ धरौटिमा रिहा गरेतापनि केही समयपछि आएको अदालतको अन्तिम फैसलाले कैद ठहर गरेको थियो ।
अदालतले कैद ठहर गरेपछि सम्पर्कबिहीन भएका दुई व्यक्तिहरू आठ वर्षपछि पक्राउ परेका हुन् । जिल्ला प्रहरी कार्यालय रुपन्देहीका प्रवक्ता डिएसपी श्यामु अर्यालका अनुसार इलाका प्रहरी कार्यालय सालझण्डीबाट खटिएको प्रहरी निरीक्षकसहितको टोलीले कञ्चन गाँउपालिका-२ वस्ने वर्ष ३४ को विष्णु भन्ने विष्णुदेव थारु र वर्ष ३७ को दिनेश थारुलाई आ-आफ्नै घरबाट पक्राउ गरेको हो ।
पक्राउ परेका दुवैजनालाई बिहीबार जिल्ला अदालत रुपन्देहीमा पेश गरेपछि सोही दिन नै कैद भुक्तानको लागि कारागार चलान भएको डिएसपी अर्यालले बताए ।