एक नाबालिकालाई जबरजस्ती करणीको आरोपमा पुर्पक्षका लागि थुनामा रहेका सन्दीप लामिछानेलाई उच्च अदालत पाटनले २० लाख रुपैयाँ धरौटीमा रिहा गरेको छ ।
उच्च अदालत पाटन न्यायाधीश ध्रुवराज नन्द र रमेश ढकालको इजलासले लामिछानेलाई विभिन्न सर्तसहित २० लाख रुपैयाँ धरौटीमा रिहा गर्न आदेश दिएको हो ।
उच्च अदालतको उक्त आदेशसँगै अब धरौटी बुझाएपछि सन्दीप कारागारबाट रिहा हुनेछन् ।
अदालतले जारी गरेको आदेशमा यो मुद्दाको फैसला नभएसम्मको लागि उनलाई नेपालबाहिर जानबाट रोक लगाइएको छ । उनको नाममा जारी भएको राहदानी रोक्का गर्न गृह मन्त्रालय र परराष्ट्र मन्त्रालयलाई जानकारी दिनुपर्ने आदेशमा उल्लेख छ ।
देशबाहिर मात्र हैन लामिछाने काठमाडौं उपत्यका बाहिर जानुपर्दा पनि प्रहरीलाई जानकारी गराउनुपर्नेछ । कुनै काम विशेका कारण लामिछानेले काठमाडौं उपत्यकाका छोड्नु पर्दा छोड्नुअघि जिल्ला प्रहरी परिसर काठमाडौंलाई लिखित जानकारी दिनुपर्ने । उक्त जानकारीमा काठमाडौं उपत्यका छाड्ने र फर्कने मिति तथा उपत्यका बाहिरी रहने स्थानसमेत खुलाउनुपर्ने उल्लेख छ ।
सन्दीपले भदौ ६ गते जबरजस्ती करणी गरेको भन्दै किशोरीले भदौ २१ गते प्रहरी वृत्त गौशालामा जाहेरी दिएकी थिइन्। जाहेरी परेको एक महिनापछि सन्दीप असोज २० गते त्रिभुवन अन्तर्राष्ट्रिय विमानस्थलबाट पक्राउ परेका थिए।
कात्तिक १८ गते जिल्ला अदालतका न्यायाधीश माधवप्रसाद घिमिरेको इजलासले लामिछानेलाई पुर्पक्षका लागि थुनामा पठाउन आदेश दिएको थियो।
बिहीबार सुनुवाइ भएसँगै अदालतले सन्दीपको पक्षमा आदेश गरेको हो। लामिछानेलाई मुद्दाको अन्तिम किनारा नलाग्दासम्म उनले अब बाहिरै रहेर मुद्दा लड्न पाउने छन्।