शारिरिक अपाङ्ता भएकी एक नाबालिकालाई पटक-पटक अप्राकृतिक मैथुन र जबरजस्ती करणी गरेको आरोपमा जिल्ला अदालतबाट सफाइ पाएका व्यक्तिलाई उच्च अदालतले १९ वर्षको कैद सजाय तोकेको छ ।
२०७६ साल श्रावणमा कास्कीको पोखरा महानगरपालिका-२८ माझठानामा बस्ने तारानाथ तिवारीले छिमेकमा बस्ने शारिरीक अपाङ्ता भएकी नाबालिकालाई पटक पटक अप्राकृतिक मैथुन र जबरजस्ती करणी गर्दै आइरहेको भन्दै जिल्ला प्रहरी कार्यालयमा जाहेरी परेको थियो ।
जाहेरीमा ती नाबालिकालाई छ पुस्ते नाताअनुसार ठूलोबुवा पर्ने तारानाथ तिवारीले विगतदेखि करणी गर्दै आइरहेको र पछिल्लो पटक श्रावण ७ गते घरमा कोही नभएको मौका पारेर आफ्नै घरमा लगेर जबरजस्ती करणी गरेको उल्लेख छ ।
जाहेरीपछि पक्राउ परेका तिवारी पुर्पक्षको लागि थुनामा गएतापनि २०७७ साल असोज २७ गते जिल्ला अदालत कास्कीका न्यायाधीश तेजेन्द्र प्रसाद शर्मा सापकोटाको आदेशले उनलाई सफाइ दियो ।
जिल्लाको निर्णय चित्त नबुझेपछि पीडित पक्षले न्याय नमिलेको भन्दै २०७८ श्रावण १२ उच्च अदालतमा पुनरावेदन गर्यो । उच्च अदालतको संयुक्त इजलासबाट न्यायाधीशद्वय डिल्लीराज आचार्य र उज्जवल शुक्लको २०७९ वैशाख १४ गतेको आदेशले जिल्ला अदालतको फैसला उल्टाउँदै तिवारीमाथि सजाय निर्धारण गर्यो ।
अदालतले पीडित बालिका, बालिकाको आमा, बालिका पढ्ने विद्यालयकी शिक्षिका, घरनजिकै पसल गरेर बस्ने एक महिलासँग समेत बयान लिएको छ । उनीहरूले बयानमा तिबारीले अपाङ्ता भएकी नाबालिकलाई पटक पटक अप्राकृतिक मैथुन गराउने गरेको कुरा बालिकाले बताएको उल्लेख गरेका छन् ।
उच्च अदातले तिवारीलाई १९ वर्ष तीन महिना कैद, १० हजार रुपैयाँ जरिवाना र पीडितलाई दुई लाख रुपैयाँ क्षतिपूर्ति भराउने आदेश दियो । उच्च अदालतको सो आदेशपछि ७१ वर्ष पुगेका तिवारी अहिले पक्राउ परेको कास्की प्रहरीका निमित्त प्रवक्ता प्रहरी निरीक्षक ज्ञान बहादुर खड्काले केटिएम दैनिकलाई बताए ।
जिल्ला प्रहरी कार्यालय कास्कीबाट खटिएको टोलीले तिवारीलाई फैसला बमोजिमको कैद, दण्ड, जरिवाना भुक्तानीको लागि पुष २२ गते घरबाट पक्राउ गरी २४ गते कास्की जिल्ला अदालतमा उपस्थित गराएर भुक्तानको लागि कारागार कार्यालय कास्की थुनामा पठाएको हो ।
