राष्ट्रिय ध्वजाबहाक नेपाल वायु सेवा निगममा विगत लामो समयदेखि क्याप्टेन अरविन्दराज पहारीको दादागिरी चल्दै आइरहेको पाइएको छ ।
विमान चालक रहेका पहारीले ल्यान्डिङको समयमा नवनियुक्त विमान परिचारिकालाई ककपिटमा राखेको विषयलाई लिएर नेपाल वायु सेवा निगममा तनावको स्थिति सिर्जना भइरहेको छ । कुनै एउटा फ्लाइटमा क्याप्टेन अरविन्द राज पहारीले ढोका हेर्ने जिम्मेवारीमा रहेकी नवनियुक्त विमान परिचारिकालाई ककपिटमा राखेर ल्यान्ड गरेका थिए तर, पद र पावरको आडमा उनीमाथि कुनै पनि कारबाही भएन ।
विमान सुरक्षा नीतिको हिसाबले पहारीले गलत गरेको भनेर आवाज उठाउने परिचारिकालाई दुर्व्यवहार गर्ने, जागिरबाट बर्खास्त गर्ने धम्की दिने, प्रोग्राममा मनोमानी गर्ने, निकटता र घनिष्ठताका आधारमा पक्षपात गर्ने गरेको पाइएको छ ।
२०७९ साल साउन ११ गते मलेसियाको राजधानी क्वालालम्पुरदेखि काठमाडौँ उडान भरेको नेपाल एयरलाइन्सको उडानमा कप्तान अरविन्द राज पहारीले एक जना परिचारिका माथि दुर्व्यवहार गरेका थिए । ककपिटमा राखेको विषयमा आवाज उठाएको भन्दै उनले कर्मचारीहरूलाई दुर्व्यवहार गरेका हुन् ।
विमान चालक पहारीले जुनियर विमान परिचारिकालाई बोलाएर सबै जिम्मा आफूले लिनु भनी अराई सिकाइ गरेर पठाएपछि सोही विमानमा रहेका सिनियर विमान परिचारिकाहरूले आफूलाई जिम्मेवारीबाट हटाइएको भन्दै निगमका उच्च तहका पदाधिकारीलाई उजुरी गरेका थिए ।
तीन महिनासम्म पनि उक्त उजुरीको कुनै सुनुवाइ भएको छैन । पहारीविरुद्ध आवाज उठाउने कर्मचारीलाई उल्टै जिम्मेवारीबाट हटाउन चलखेल भएको छ । उक्त परिचारिकाको फ्लाइट परेको दिन पहारी जहाज नउडाउने धम्की दिन्छन् । र उनको कुरामा निगमका उच्च तहका कर्मचारीले पनि हो मा हो मिलाउने गरेको स्रोतले केटिएम दैनिकलाई बतायो ।
ती परिचारिकाको उजुरी तिन महिनासम्म सुनुवाइ नभए पनि पहारी निकट रहेका अन्य परिचारिकाको उजुरी तीन दिन भित्रमै सुनुवाइ भएको समेत स्रोत बताउँछ । ३ महिनाबाट न्यायको लागि एक परिचारिका भौतारिरहँदा अन्यको उजुरीको सुनुवाइ भने उजुरी परेको ३ दिनभित्र नै सर्कुलर जारी गरेर सम्बोधन गरिएको छ ।
पीडित कर्मचारीहरूले मङ्सिर २९ गते बिहीबार निगमको केन्द्रीय कार्यालयमा शान्तिपूर्ण आन्दोलन गरेकै दिन उनीहरूलाई साथ नदिने नौ जना कर्मचारीहरूलाई हामीलाई साथ नदिएकोमा धन्यवाद भनेका थिए । त्यही विषयलाई लिएर उच्च पदाधिकारी निकट नौ जना कर्मचारीले हामीमाथि हिंसा भयो, हामीलाई काम गर्न असहज भयो भनेर पुस १ गते उजुरी गरेका थिए ।
केटिएम दैनिकले प्राप्त गरेको नेपाल वायुसेवा निगमको १८ डिसेम्बर २०२२ (२०७९ साल पौष ३ गते) को आन्तरिक सर्कुलरमा काम गर्ने वातावरण कायम राख्न आग्रह गरिएको छ । सोही पत्रमा गुटबन्दी र ड्युटीमा सहकर्मीलाई दुर्व्यवहार गर्ने गरेको उजुरी परेको बताइएको छ । त्यसका साथै सबै जना मिलेर आफ्नो कर्तव्य पुरा गर्न अनुरोध गरिएको छ ।
केटिएम दैनिकले पुस ५ गते मङ्गलवार “पाइलटले विमान परिचारिकालाई ककपिटमा राखेपछि निगममा बबण्डर, उजुरी गर्ने कर्मचारीको जागिर खोस्ने प्रयास” शीर्षकमा समाचार लेखेपछि सम्पर्कमा आएकी निगमको एक पूर्व कर्मचारीले पहारीले लामो समयदेखि कर्मचारीमाथि अन्याय, अत्याचार, विभेद तथा हिंसा गर्ने गरेको बताइन् ।
२०७३ चैतमा निगममा क्याबिन–क्रु उपनिर्देशक रहेका अरविन्दराज पहारीले पदको दुरुपयोग गरी सेवा–सुविधामा अन्याय गरेको भन्दै नेपाल वायुसेवा निगमका पाँच दर्जनभन्दा बढी ‘क्याबिन–क्रु’ ले उच्च व्यवस्थापन गुहारेका थिए । ६ वर्षअगाडि देखि पदको दुरुपयोग गर्दै आएका पहारीलाई कानुनअनुसार कारबाही गर्ने आँट भने कसैले गरेका छैनन् । त्यस बेला नागरिक दैनिकमा सुशील भट्टराई को बाइ लाइनमा समाचार प्रकाशित भएको थियो ।
पहारीलाई क्याप्टेन आरके शेरचन, उच्च तहका कर्मचारीहरू सुमिलि सुब्बा जुहार्चन र विकास श्रेष्ठको समेत समर्थन रहेकोले उनको दादागिरी बढेको स्रोत बताउँछ । पहारीले आफ्नो निकट रहेका एयरहोस्टेसलाई कामको सम्पूर्ण जिम्मा दिँदै ‘इन्फ्लाइट सुपरभाइजर’ (आइएफएस) हरूलाई हीनताबोध गराउने कार्य गर्दै आइरहेका छन् ।
केटिएम दैनिकसँग सम्पर्कमा आएकी एक पूर्व कर्मचारीले भने पहारीले विगत लामो समयदेखि त्यहाँ कार्यरत स्थायी कर्मचारीहरूलाई समेत दु:ख दिने गरेको बताइन् । उनले भनिन् ‘उहाँले आफ्नो फेवरेट परिचारिकाहरूलाई उडाउन अरूको पालो मिच्ने गर्नुहुन्थ्यो । म जत्तिको ठुलो र जान्ने कोही छैन भन्ने अहम् भावना उहाँमा थियो । अहिले त उहाँमा परिवर्तन आयो होला भन्ने लागेको थियो तर समस्या उही रहेछ । हामी त स्थायी कर्मचारी थियौँ तर अहिलेका करारका बहिनीहरूमाथि कति अत्याचार भइरहेको होला त ?’ उहाँलाई अहिलेसम्म पनि किन कारबाही गरिएन, उनले प्रश्न गरिन् ।
यस विषयमा केटिएम दैनिकले थप फ्लोअप गर्नेछ ।
थप अपडेट : विमान परिचारिकामाथि दुर्व्यवहार गर्ने चालकलाई उडान गर्न रोक