२०७४ सालको प्रतिनिधि सभा निर्वाचनमा ८० सिट ल्याउँदै पहिलो दल बनेको नेपाल कम्युनिस्ट पार्टी (एमाले) ले यसपटकको निर्वाचनमा ४४ सिटमा खुम्चिन पुग्यो । २०७४ र अहिले सोही निर्वाचन क्षेत्रमा उम्मेदवारी दिएकामध्ये १५ जना पुन निर्वाचित भएका छन् । तीमध्ये दुईजनाले मात्र अघिल्लो निर्वाचनको तुलनामा बढी मत पाएको निर्वाचन आयोगको तथ्याङ्कले देखाउँछ ।
तथ्याङ्क विश्लेषण गर्दा पाँच हजार सम्म मत गुमाउनेको सङ्ख्या एक छ भने, पाँच हजारदेखि १० हजारसम्म मत गुमाउनेको सङ्ख्या आठ छ । त्यस्तै तीन जनाले १० हजारदेखि १५ हजार मत गुमाउँदा एक जनाले १६ हजार बढी मत गुमाउँदै निर्वाचित भएका छन् ।
२०७४ सालमा नेपाली कांग्रेसले जितेको २३ सिटमध्ये अहिले ११ वटा सिटमा मात्र पुन: निर्वाचित हुँदा २ जनाले मत बढाएजस्तै एमालेको अवस्था पनि त्यस्तै छ ।
प्रधानमन्त्री समेत रहेका नेपाली कांग्रेसका सभापति शेर बहादुर देउवाले अघिल्लो निर्वाचनको तुलनामा दुई हजार ९१२ मत घटाउँदै निर्वाचित हुँदा एमाले अध्यक्ष तथा पूर्वप्रधानमन्त्री केपी शर्मालाई ओलीलाई ०७४ मा भोट दिएका ५७ हजार १३९ मध्ये चार हजार ८२० जनाले यसपटक मत दिएनन् ।
धनुषा-४ बाट पुन: निर्वाचित रघुबीर महासेठ र सिराहा-३ बाट निर्वाचित लिलानाथ श्रेष्ठबाहेक पुन:सोही क्षेत्रबाट निर्वाचित भएका एमालेका सासंदहरूले मत बढाउन सकेनन् । महासेठले अघिल्लो निर्वाचनको तुलनामा नौ हजार ७०४ मत बढाउँदा श्रेष्ठले चार हजार ७९३ मत बढी पाए ।
यस निर्वाचनमा नयाँ पार्टीको उदय, बाम गठबन्धन तोडिएको, एमालेबाट नेकपा (एकीकृत समाजवादी) बनेको हुनाले पनि एमालेले सोचेजस्तो सिट जित्न नसकेको चर्चा परिचर्चा हुने गरेको छ । २३ सिटबाट ५७ सिटमा पुगेको कांग्रेसले गठबन्धनकै बलमा माथि उठेको चर्चा चलिरहँदा अघिल्लो पटक ३६ सिट जितेको माओवादी केन्द्र यसपटक गठबन्धन भएतापनि १८ मा खुम्चिन पुग्यो ।
एमाले अध्यक्ष केपी शर्मा ओली २०७४ सालमा झापा-५ बाट ५७ हजार १३९ मतका साथ निर्वाचित हुँदा अहिले भने ५२ हजार ३१९ मत पाए । उनले अघिल्लो निर्वाचनको तुलनामा चार हजार ८२० मत गुमाउनु परेको आयोगको तथ्याङ्कले देखाउँछ ।
बैतडीमा दामोदर भण्डरीले अघिल्लो निर्वाचनको तुलनामा पाँच हजार ९१३ मत गुमाउन पुगे । ०७४ मा उनी ३९ हजार ५२४ मतका साथ निर्वाचित हुँदा अहिले ३३ हजार ६११ मत पाउँदै निर्वाचित हुन पुगे ।
- यी हुन् एमालेबाट प्रतिनिधिसभाका ३४ समानुपातिक सांसद
- तेस्रोपटकको प्रतिस्पर्धामा विजय गच्छदारलाई पराजित गर्दै एमालेकी भगवती चौधरी विजयी
गुल्मी-२ मा गोकर्ण राज विष्टले छ हजार १४२ मत गुमाउनु पर्यो । गत निर्वाचनमा ३४ हजार ६१८ मत पाएका विष्टलाई भोट दिएकामध्ये केहीले अहिले नेकपा (एकीकृत समाजवादी) बाट निर्वाचनमा सहभागी भएकी रामकुमारी झाँक्रीलाई मत दिएको त्यहाँका मतदाता बताउँछन् । विष्ट अहिले २८ हजार ४७३ मतका साथ निर्वाचित हुँदा पहिलो पटक प्रत्यक्ष निर्वाचनमा सहभागी भएको झाँक्रीले २६ हजार ४४१ मत पाइन् ।
इलाम-२ बाट एमाले उपाध्यक्ष सुवास चन्द्र नेम्वाङ्ग पुन निर्वाचित भए तर यसपटक भने उनले अघिल्लो पटकको भन्दा कम मत पाए । गत निर्वाचनमा ३६ हजार ५१७ मतका साथ निर्वाचित भएका नेम्वाङ्गले यसपटक भने ३० हजार २० मतका साथ निर्वाचन भए । उनले अघिल्लोको तुलनामा छ हजार ४९७ मत गुमाउनु परेको छ ।
०७९ को निर्वाचनमा सबैभन्दा कम मतान्तर कायम गरेर निर्वाचित हुने सासंदहरूमा पहिलो नम्बरमा पर्छन् वसन्त कुमार नेम्वाङ्ग । गत निर्वाचनमा ३८ हजार ६४१ मतका साथ निर्वाचित भएका नेम्वाङ्गले यसपटक छ हजार ५०६ मत गुमाउँदै ३२ हजार १३५ मत पाए ।
एकमात्र प्रतिनिधि सभा निर्वाचन क्षेत्र रहेको धनकुटामा पुन निर्वाचित भएका राजेन्द्र कुमार राईले अघिल्लो निर्वाचनको तुलनामा सात हजार २३२ मत गुमाउन पुगे । २०७४ सालको निर्वाचनमा राई ३७ हजार ३३३ मत पाउँदा अहिले ३० हजार १०१ मत पाउँदै निर्वाचित भएका हुन् ।
धनकुटाजस्तै एकमात्र निर्वाचन क्षेत्र रहेको ताप्लेजुङमा पूर्वपर्यटनमन्त्री समेत रहेका योगेश कुमार भट्टराई अघिल्लो निर्वाचनको तुलनामा सात हजार ५३६ मत गुमाउन पुगे । ०७४ मा भट्टराई २९ हजार ४७९ मत पाउँदै निर्वाचित भएकोमा यसपटक निर्वाचित हुँदा २१ हजार ९४३ मत पाए ।
धनकुटा र ताप्लेजुङ जस्तै एकमात्र निर्वाचित क्षेत्र रहेको पर्वतबाट पुन: निर्वाचित भएका पदम गिरीले अघिल्लो निर्वाचनको तुलनामा नौ हजार ४०३ मत गुमाउनु पर्यो । ०७४ को निर्वाचनमा उनी ३९ हजार २७५ मतका साथ निर्वाचित भएका थिए भने अहिले उनले २९ हजार ८७२ मत पाए ।
रुपन्देही १ मा छविवाल विश्वकर्माले गत निर्वाचनको तुलनामा नौ हजार ८७० मत गुमाउनु पर्यो । ०७४ मा उनलाई ३४ हजार ७५२ मतदाताले भोट हालेकोमा यसपटक भने २४ हजार ८८२ मतदाताले मात्र रुचाए ।
सूचना तथा सञ्चारमन्त्री हुँदा ७० करोड घुस खाएको आरोप लागेका गोकुल प्रसाद बाँस्कोटाले १० हजार १८१ मत गुमाउँदा समेत पुन निर्वाचित हुन पुगे । ०७४ मा बाँस्कोटालाई ५५ हजार ५२६ मतदाताले भोट दिएकोमा यसपटक भने ४५ हजार ३४५ जनाले मात्र रुचाए ।
काठमाडौं-९ मा कृष्ण गोपाल श्रेष्ठले अघिल्लो निर्वाचनको तुलनामा १० हजार ८९६ मत कम ल्याएतापनि पुन:निर्वाचित भए । ०७४ को उनी २२ हजार ८५२ मतका साथ निर्वाचित भएका थिए भने अहिले उनी निर्वाचित हुँदा पाएको मत ११ हजार ९५६ छ ।
झापा-४ मा बाट पुन: निर्वाचित भएका लाल प्रसाद साँवा लिम्बूले अघिल्लो निर्वाचनको तुलनामा १४ हजार २०० मत गुमाए । ०७४ सालको निर्वाचनमा लिम्बूले ४३ हजार ५१५ मत पाएकोमा यसपटक २७ हजार १६५ मत पाए ।
पुन सोही निर्वाचन क्षेत्रबाट निर्वाचित भएका एमालेका १५ सासंदमध्ये सबैभन्दा धेरै मत गुमाउनेमा पर्छन् एमाले उपाध्यक्ष विष्णुप्रसाद पौडेल । २०७४ मा ४४ हजार ९ जनाले पौडेलाई भोट दिएकोमा यसपटक २७ हजार १६५ जनाले मात्र मत दिए । उनले यो पाँच वर्षको अवधिमा १६ हजार ८४४ भोट गुमाउन पुगे ।
