निर्वाचन आयोगले मंसिर ४ गते सम्पन्न भएको प्रतिनिधि सभा र प्रदेशसभामा समानुपातिक तर्फको मतगणना सम्पन्न भएको जनाएको छ ।
निर्वाचन आयोगको वेवसाइटमा राखेको पछिल्लो विवरणअनुसार एक करोड पाँच लाख लाख ६० हजार ८२ जनाले प्रतिनिधि सभाको समानुपातिकमा मत दिएका छन् । तर सातवटै प्रदेशसभाको समानुपातिक मत भने संघको भन्दा साढे दुई लाखले कम छ ।
प्रदेशसभा खर्चिलो भएको भन्दै निर्वाचनअगाडि देखी नै सामाजिक सञ्जालमा प्रदेशसभा खारेज गर्नु पर्छ भन्ने ह्विम चलिरहेको बेला झण्डै तीन लाखले प्रदेशसभामा भोट हालेनन् । सातवटा प्रदेशसभाको समानुपातिक मतको योगफल एक करोड तीन लाख ६० हजार ११ छ जुन प्रतिनिधिसभाको मतभन्दा दुई लाख ५४ हजार ७१ ले कम हो ।
यसको अर्थ प्रतिनिधिसभाको समानुपातिकमा मत दिएका साढे दुई लाख बढीले प्रदेशसभाको समानुपातिकमा मत दिनु उचित ठानेनन् र मत दिएनन् ।
प्रदेशगत रुपमा हेर्दा प्रदेश नम्बर १ मा १८ लाख ९९ हजार १४४ मत, मधेश प्रदेशमा २० लाख ८६ हजार २९८ मत, बागमती प्रदेशमा १९ लाख ७३ हजार ४७४ मत, गण्डकी प्रदेशमा नौ लाख ८५ हजार ८०२ मत, लुम्बिनी प्रदेशमा १८ लाख ८७ हजार ७८ मत, कर्णाली प्रदेशमा पाँच लाख ७७ हजार ८२९ मत र सुदूरपश्चिम प्रदेशमा आठ लाख ९६ हजार ३८६ मत प्रदेशसभाको समानुपातिकमा खसेको निर्वाचन आयोगको विवरणमा उल्लेख छ ।
समानुपातिक तर्फ निर्वाचन आयोगका प्रवक्ता गुरु प्रसाद वाग्लेले ‘प्रदेश र संघको समानुपातिक मत भिडाएर नहेरेको बताएका छन् । आयोगले बुधबार संघ र प्रतिनिधि सभाको सिट बाँडफाँड समेत गरिरहेको छ ।
संघमा कुल सदर समानुपातिक मतको तीन प्रतिशत थ्रेसहोल्ड कटाउने सात वटा राजनैतिक दलहरूले समानुपातिक निर्वाचन प्रणालीबाट सिट पाउँदा प्रदेशमा थ्रेसहोल्ड १.५ प्रतिशत छ ।
प्रतिनिधिसभामा १६५ क्षेत्रबाट प्रत्यक्ष सासंद निर्वाचित हुँदा ११० जना समानुपातिक निर्वाचन प्रणालीबाट आउनेछन् । जबकी प्रदेशमा प्रत्यक्षतर्फ ३२० प्रत्यक्ष र समानुपातिक तर्फ २२० जना सासंद हुन्छन् ।