भारतमा रहेकी नायिका स्वस्तिमा खड्का र बलिउड कलाकार सौरभ शुक्लाबीच भेटवार्ता भएको छ । भारतको चण्डीगढमा जारी इन्डस भ्याली अन्तर्राष्ट्रिय फिल्म फेस्टिभलमा भाग लिन खड्का पुगेको बेला उनीहरूबीच कुराकानी भएको हो ।
नायिका खड्काले शुक्लासँग भेटको तस्विरहरु इन्स्टाग्राममा राख्दै नेपाल र भारतीय फिल्म उद्योगको सम्बन्धको बारेमा कुराकानी भएको उल्लेख गरेकी छन् ।
स्वस्तिमाले क्याप्सनमा लेखेकी छन्, ‘उहाँ (सौरभ शुक्ला) ले नेपाली फिल्म उद्योगको बारेमा जान्न देखाउनुभएको चासो र आफ्नो कामको अनुभव आदान प्रदान गरेको देख्नु साँचिक्कै रोचक थियो ।’
अभिनेत्री खड्काले इन्स्टाग्राममा शेयर गरेका दुईवटा तस्विरमा उनले सौरभ शुक्लाको कुरा चाखपूर्वक सुनेको देखिन्छ भने सौरभले पनि स्वस्तिमाको कुरा गम्भीरतापूर्वक सुनेका छन् ।
शुक्लाले ‘जोली एलएलबी’, ‘पिके’, ‘सत्य’, ‘पागलपन्ती’, ‘किक’, ‘गुन्डे’, ‘बाला’, ‘ओ माइ गड’ लगायतका सयभन्दा बढी बलिउड फिल्ममा अभिनय गरेका छन् । सौरभले ‘जोली एलएलबी २’बाट राष्ट्रिय फिल्म अवार्ड समेत पाएका थिए ।