ताप्लेजुङ सदरमुकाम फुङलिङको वीरेन्द्र चोकमा रहेको आइएमईबाट नगद तथा गरगहना लुटिएको छ ।
चार जनाको समूहले नगद ११ लाख ५५ हजार रुपैयाँ र गरगहना लुटेको प्रारम्भिक जानकारी आएको ताप्लेजुङ्ग प्रहरी प्रमुख प्रहरी नायव उपरीक्षक कैलाश राईले केटिएम दैनिकलाई बताए ।
राईका अनुसार बिहान आइएमई खोल्नेबित्तिकै कर्मचारी छिर्ने पछाडिको ढोकाबाट लुटेराहरू प्रवेश गरेका हुन् । उनीहरूले कति परिमाणको सुन लुटेका छन् भन्ने कुरा अनुसन्धानकै क्रममा छ ।
चार जनाको समूहमध्ये तीनजना एकैसाथ आइएमईमा प्रवेश गरी कार्यरत एक कर्मचारीलाई नियन्त्रणमा लिई रकम र गरगहना लिएर भागेका हुन् ।
आइएमई सञ्चालक अमर श्रेष्ठ र उनका श्रीमती मैया श्रेष्ठ देश बाहिर रहेकोले कर्मचारीले चलाइरहेका थिए । नेपाल प्रहरी र सशस्त्र प्रहरीले लुटेरा समूहको खोजी गरिरहेका छन् । जिल्लाका मुख्य नाकामा समेत निगरानी गरिएको डिएसपी राईले जनाए।