काठमाडौंबाट झापा जाँदै गरेको यात्रुबाहक बस आइतबार मध्यरातमा हेटौंडामा दुर्घटनामा परेको छ ।
ना७क २०३२ नम्बरको यात्रु बस हेटौँडा उपमहानगरपालिका-१५ स्थित चुरियामाई भन्ने स्थानमा दुर्घटनामा परेको हो ।
बस दुर्घटनामा परेर दुई जनाको निधन भएको र ३६ जना घाइते भएको जिल्ला ट्राफिक प्रहरी कार्यालय मकवानपुरका प्रहरी निरीक्षक मोगेन्द्र थापाले केटिएम दैनिकलाई बताए ।
थापाका अनुसार घाइतेमध्ये दुईजनालाई थप उपचारको लागि भरतपुर लगिएको छ अन्य हेटौंडामा नै उपचार जारी छ तीमध्ये केही डिस्चार्ज भइसकेका छन् ।
मृत्यु हुनेमा झापाको दमक–५ मोडेल क्याम्पस नजिक बस्ने ६० वर्षीय दिल्लीबहादुर दर्जी र मोरङ बेलबारी नगरपालिका–८ बस्ने ५१ वर्षीया कल्पना राजवंशी रहेको जिल्ला प्रहरी कार्यालय मकवानपुरका प्रवक्ता टेकबहादुर कार्कीले जानकारी दिए ।
उकालोमा हावा पम्प फुटेको र ब्रेक नलागेपछि चालकले सबै यात्रुहरूलाई गाडिको पछाडि जान अनुरोध गरेर गाडीलाई नालामा लगेर सेफ ल्यान्डिङ गरेको थापाले बताए । यही क्रममा सबै यात्रुहरू पछाडिको भागमा जान सकेनन् । सामाजिक सञ्जालमा सार्वजनिक भएका तस्बिरहरूमा यात्रुहरू गाडिको पछाडिको भागबाट बाहिर निस्किरहेको देख्न सकिन्छ ।
३६ जना घाइतेमध्ये हेटौडा अस्पतालमा २९ जना, चुरेहिल अस्पतालमा एक जना, सन्चो अस्पताल हेटौडामा एक जना, पुरानो मेडिकल कलेज भरतपुर चितवन ३ जना उपचार भई रहेको र दुईजनालाई थप उपचारको लागी काठमाण्डौ रिफर गरिएको छ ।