नेकपा माओवादी केन्द्रका अध्यक्ष पुष्पकमल दाहाल प्रचण्डले चुनावको मुखमा द्वारिकलाल चौधरी नेकपा माओवादी केन्द्रमा प्रवेश गर्नु प्रतिगामिहरुको लागि चोटिलो प्रहार भएको दाबी गरेका छन् ।
सुनसरीको इटहरी उपमहानगरपालिकाका पूर्वमेयर द्वारिकलाल चौधरी नेकपा माओवादी केन्द्रमा प्रवेश गरेका हुन् ।
आज बिहान चौधरीसहित नेकपा एमालेका नेता–कार्यकर्ताहरुलाई माओवादी केन्द्रमा स्वागत गर्दै प्रचण्डले एमालेको प्रतिनिधोत्व गरिसकेका र जिम्मेवारी समालेका चौधरी माओवादी प्रवेश गर्नुको विषेश अर्थ भएको बताँउदै प्रतिगामिहरुको लागि चोटिलो प्रहार भएको र चौधरीको यो फैसला एकदम सहि भएको बताएका छन् ।
प्रचण्डले भने ‘चुनावको संघारमा देशमा प्रतिगामिहरुले पटक पटक टाउको उठाउन खोजिरहेको बेला चोटिलो प्रहार गर्दै परिवर्तन र क्रान्ति र जनताको पक्षमा तपाँईले सहि फैसला लिनु भएको छ । अब नेपालमा माओवादी केन्द्रले मात्र परिवर्तन र जनताको हितमा काम गर्न सक्छ भनेर एमालेको प्रतिनिधोत्व गरिसकेका र जिम्मेवारी समालेको व्यक्ति माओवादीमा प्रवेश गर्नुको विषेश अर्थ अर्कै छ जस्तो लाग्छ ।’
इटहरी १७ घर भएका चौधरी २०४१ सालदेखि अनेरास्ववियुमा संगठित भएर राजनीतिमा लागेका थिए । २०७२ सालमा एमाले सुनसरी जिल्ला अध्यक्ष अध्यक्ष भएका उनी २०७४ को स्थानीय तह निर्वाचनमा इटहरी उपमहानगरपालिकाको मेयर निर्वाचित भएका थिए ।
चौधरी माओवादीमा प्रवेश गरेको विषयलाई लिएर कतिले उनलाई अवसरवादीको ट्याग भिराइदिएका छन् । चुनाव नजिकिँदै जाँदा एमालेबाट प्रदेशसभाको टिकट नपाउने भएपछि चौधरी टिकटको लागि माओवादी केन्द्र प्रवेश गरेको भन्दै आलोचना भइरहेको छ ।
