खाद्य व्यवस्था तथा व्यापार कम्पनी लिमिटेड बागमती प्रादेशिक कार्यालयले बजारमूल्य भन्दा प्रतिकेजी ५० रुपैयाँ सस्तोमा च्यांग्रा बिक्री गरिरहेको छ ।
खाद्य व्यवस्थाको दसैं सहुलियत पसलमा जिउँदो खसी ६७०, बोका ६७० र च्यांग्रा १२ सय ५० रुपैयामा बिक्री गर्न थालेको हो । चौपाया खरिद बिक्री सेवा संघले लोकल खसीबोकाको मूल्य प्रतिकिलो ६८० देखि ७१० रुपैयाँ र च्याङग्रा प्रतिकिलो १३ सय रुपैयाँ तोकेको तोक्दा खाद्यले सहुलियत मूल्यमा विक्री गरिरहेको छ ।
साथै कलंकीको खसी बजारसहित काठमाडौं उपत्यकाका विभिन्न स्थानमा बिक्रेता र क्रेताबीच आपसी मोलतोल गरेर पनि खसी, बोका र च्यांग्रा बिक्री भइरहेका छन् ।
लेकमा पाइने जडिबुटी खाएर हुर्किएका भेँडाच्यांग्राको मासु स्वादिष्ट र स्वास्थ्यका लागि पनि फलदायी हुने विश्वासले दसैंमा भेँडाच्यांग्राको माग बढी हुन्छ । च्याङ्ग्राको तयारी मासु प्रतिकिलो दुई हजार सात सयदेखि दुई हजार आठ सय सम्ममा बिक्री वितरण गर्ने मासु पसल व्यवसायीहरूले जनाएका छन् ।
सामान्य अवस्थामा व्यापारीहरूले दसैँलाई लक्षित गर्दै तिब्बतबाट च्याङ्ग्रा ल्याउने गरेकामा विगत तीन वर्षयता तिब्बतबाट भेडाच्याङ्ग्रा मुस्ताङ हुँदै नेपालका विभिन्न सहरहरुमा जाने क्रम कम भएको हो ।