गत वैशाखको स्थानीय चुनावपछि विवेकशील साझाको अध्यक्षबाट राजीनामा दिएका रवीन्द्र मिश्र आज राष्ट्रिय प्रजातन्त्र पार्टी (राप्रपा)मा प्रवेश गर्दै छन् । पार्टी प्रवेश कार्यक्रम आज दिउँसो १ बजे राष्ट्रिय सभागृह काठमाडौंमा आयोजना गरिंदै छ ।
राप्रपाका प्रवक्ता एवम् प्रचार विभाग प्रमुख मोहन श्रेष्ठले रवीन्द्र मिश्र नेतृत्वको ‘वृहत ध्रुवीकरण पक्षधर’ बीच एकता घोषणा समारोह हुन लागेको जानकारी दिए । मिश्रले राप्रपाको कुन पद पाउने भन्ने औपचारिक रुपमा सार्वजनिक भइसकेको छैन ।तर राप्रपाले उनलाई वरिष्ठ उपाध्यक्ष पद दिएर पार्टीमा स्वागत गर्ने बुझिएको छ ।
मिश्रसहित केही नेताहरू राप्रपामा प्रवेश गराउन राष्ट्रिय सभागृह भृकुटीमण्डपमा बुधबार दिउँसो १ बजे कार्यक्रम राखिएको राजेन्द्रे लिङदेनले समाजिक संञ्जाल फेसबुक मार्फत जानकारी दिएका छन् ।
अध्यक्ष लिङदेनले समाजिक सञ्जाल फेसबुकमा लेखेका छन् ‘राप्रपा र रवीन्द्र मिश्र नेतृत्वको बृहत् ध्रुवीकरण पक्षधर समूह बीच हुने एकता घोषणा सभामा सहभागीताका लागि हार्दिक आमन्त्रण गर्दछु ।’
२०७४ सालको संघीय निर्वाचनमा काठमाडौं क्षेत्र नम्बर १ बाट विवेकशील साझा पार्टीका रवीन्द्र मिश्र झिनो मतान्तरले कांग्रेसका प्रकाशमान सिंहसँग पराजित हुन पुगेका थिए । सिंह १० हजार ९३६ मतका साथ निर्वाचित हुँदा पूर्व सञ्चारकर्मी समेत रहेका मिश्रले १० हजार ११८ मत पाएका थिए । उनी ८१८ मतान्तरले पराजित हुन पुगेका हुन् ।
मिश्र अहिले राप्रपा प्रवेश गरेर अहिले सोही क्षेत्रबाट निर्वाचन लड्ने तयारी गरिरहेका छन् ।
