नेकपा एमालेका सचिव योगेश भट्टराईले जननेता मदन भण्डारी पार्टीभित्र फरक मत राख्नेहरुसँग पनि सहकार्य गर्न सक्ने क्षमतावान विशाल व्यक्तित्व भएको बताएका छन् ।
काठमाडौंमा आयोजित ‘जननेता मदन भण्डारीको म्यूजिक भिडियो’ विमोचन कार्यक्रममा बोल्दै जननेता भण्डारीको विचार महाधिवेशनबाट अत्याधिक बहुमतले पास हुँदा पनि आफ्नो विचारको विपक्षमा रहेका नेतालाई अध्यक्षमा प्रस्ताव गरेको स्मरण गर्दै सचिव भट्टराईले आजको राजनीतिमा यस्तो महान सोच र संस्कार नभएकोे बताए ।
उनले भने, ‘जननेता मदन भण्डारीको विचार महाधिबेसनबाट अत्याधिक बहुमतले पास हुँदा मनमोन अधिकारी, सिपी मैनाली, झलनाथ खनाल जस्ता वरिष्ठ नेताहरु उहाँको विचारको विपक्षमा थिए । तर, जब उहाँको विचार हलमा पारीत भयो र आफ्नो विचारको विपक्षमा विचार राख्ने नेतालाई बोलाएर मनमोहन अधिकारीलाई पार्टी अध्यक्षमा प्रस्ताब राख्नुभयो आजको राजनीतिमा यो दुर्लब कुरा हो । पार्टीभित्र फरक मत राख्नेहरुसँग सहकार्य गर्न सक्ने त्यो विशाल व्यक्ति हो मदन भण्डारी ।’
दुनियाँको कम्युनिष्ट आन्दोलनलाई नेपालको धर्तीमा जनविश्वास प्राप्त गर्ने गरी जनताको अभिमत प्राप्त गर्ने एउटा पार्टी संगठन निर्माण गर्ने काम गरेको बताँउदैं कम्युनिष्ट आन्दोलनलाई लोकतान्त्रिकरण गर्ने र कम्युनिष्ट आन्दोलनलाई सामाजिक आन्दोलनमा रुपान्तरण गर्ने काममा मदन भण्डारीको योगदान रहेको बताए ।