भन्सार छलिको आशंकमा राजश्व अनुसन्धान विभागले बरामद गरेको सामान भोलिपल्टै आयातकर्तालाई फिर्ता दिइएको पाइएको छ ।
काठमाडौं महानगरपालिका-२२ खिचापोखरीमा रहेको अबिरु इनटरप्राइजेजले हङ्कङबाट भारत हुँदै नेपाल भित्र्याएको दुई ट्रक सामान मंगलबार राजश्व अनुसन्धान विभागले बरामद गरेको थियो ।
ना ६ ख ६६३७ र ना ३ ख ४९७१ नम्बरका ट्रकमा ल्याइएका ११ हजार ५६७ वटा ज्याकेटहरूको भन्सार कम मूल्याङ्कन गरेर सुख्खा बन्दरगाह वीरगञ्ज भन्सार कार्यालयबाट पास भएको भन्दै विभागले ट्रक नियन्त्रणमा लिएको थियो ।
मंगलबार नियन्त्रणमा लिइएका ट्रकहरू भने बुधबार आयातकर्तालाई नै बुझाइएको पाइएको छ । अबिरु इनटरप्राइजेजका संचालक अभिषेक प्रधान भने हरिहरभवनबाट सामानको भन्सार बुझाएर सामान ल्याएको दाबी गर्छन् । भन्सार रकम कति बुझाउनुभयो भन्ने प्रश्नको उत्तर भने उनले दिन मानेनन् ।
केटिएम दैनिकले प्राप्त गरेको विवरणमा बालबच्चाको ज्याकेट सात हजार ९३२ पिस, युवाहरूको ज्याकेट एक हजार २६० पिस र महिलाहरूको ज्याकेज दुई हजार ३७५ पिस आयात गरिएको उल्लेख छ । उक्त्त पत्रमा बालबच्चाको ज्याकेटको मूल्य दुई डलर, महिलाको ज्याकेटको मूल्य चार डलर र पुरुषको ज्याकेटको मूल्य पाँच डलर निर्धारण गरिएको छ ।
भन्सारमा सामान पेश गर्दा वास्तविक समान भन्दा छ गुणा कम सामानको विल पेश गर्ने जानकारहरू बताउँछन् । उनीहरूका अनुसार १०० वटा सामानको बिलमा बास्तविक रुपमा ६०० वटा सामान पास गराइएको हुन्छ ।
बिलअनुसार साढे ११ हजार पिस ज्याकेज २४ घण्टामा विभागले कसरी अनुसन्धान गर्यो भन्ने प्रश्नको उत्तर खोज्न हामीले विभागका प्रवक्तासँग सम्पर्क गरेका थियौं ।विभागका उपमहानिर्देशक तथा प्रवक्ता प्रधुम्न प्रसाद उपाध्याय आफू अहिले मधेश प्रदेशमा रहेकोले यसबारे जानकारी दिन नसक्ने बताए ।
प्रवक्ताको उत्तरपछि हामीले महानिर्देशक झलकराम अधिकारीसँग सम्पर्क गर्न खोज्दा उनी हाम्रो सम्पर्कमा आउन चाहेनन् । परिचय र घटना विवरणसहित एमएमएस गर्दा पनि अधिकारी हाम्रो सम्पर्कमा आएनन् ।
वीरगञ्जस्थित सुख्खा बन्दरगाह भन्सार कार्यालयका प्रमुख जय बहादुर भण्डारीसँग सम्पर्क स्थापित नभएपछि हामीले सोही कार्यालयका भन्सार अधिकृत तथा सूचना अधिकारी सन्तोष कुमार न्यौपानेलाई भन्सार तिरेर आएका सामानहरू किन बाटोमा पक्राउ पर्छन् भनेर सोध्यौं ।
हाम्रो प्रश्नको उत्तर दिँदै उनले भने, ‘भन्सारबाट ग्रीन, एल्लो र रेड लेन गरी तीनवटा लेनहरूमा सामानहरु पास हुन्छन् । आयातकर्ताले दावी गरेअनुसारको सामान ग्रीन लेन मार्फत छुट्छन् र आयातकर्ता दावी गरेको र विल पेश गरेको अनुसारका सामानहरू एल्लो लेनबाट छुट्छन् भने आयातकर्ताले पेश गरेको विल र सामानमा आशंका लागेमा हामीले फिजिक्कली चेकचाँज गरी छाडेका सामानहरू रेड लेन अन्तरगत पास हुन्छन् ।’
जुनसुनकै लेनबाट छुटेका सामानहरू पनि राजश्व अनुसन्धान विभागले सूचनाको आधारमा वा र्यान्डम चेक गर्ने गर्छन् । विभागले शंका लागेर बरामद गरेका ९० प्रतिशत केशहरूमा भन्सार दाखिला कम भएको पाइने उनले बताए ।
यो सामान छुटाउनको लागि केन्द्रीय राजनीतिमा आवद्ध सिन्धुपाल्चोक गृहजिल्ला भएका केही नेताहरू लागेको स्रोतको दाबी भएतापनि उक्त कुरालाई हामीले पुष्टि गर्न सकेनौं ।