झापामा ७३ वर्षीया वृद्धाबाट करणीमा परेका दुई बालिकालाई सेफ हाउस लगिएको छ ।
झापाको मेचीनगर नगरपालिका-१२ माथिल्लो थाइजन बस्ने ७३ वर्षीय कपिल मनि पौडेललाई ११ र १७ बर्षीया बालिका करणी गरेको अभियोगमा आज बिहान पक्राउ गरिएको हो ।
इलाका प्रहरी कार्यालय अनारमनीको टोलीले पौडेललाई शुक्रबार बिहान घरबाटै पक्राउ गरेको इप्रका अनारमनीका प्रमुख डिएसपी रुगम कुँवरले केटिएम दैनिकलाई बताए ।
दुई बालिकामध्ये एक बालिका गर्भवती समेत छिन् । वृद्ध पौडेल पुरोहित भएको बताइएको छ भने नाबालिगहरू दिदीबहिनी हुन् ।
दुई बालिकालाई अधिकारकर्मी दीपक दास, व्यवसायी टिका गौतम लगायतले पहल गरेर दमक नगरपालिकाको सेफ हाउसमा लगेका हुन् । बालिकाहरूलाई केही दिनपछि प्रदेश १ सरकारले सञ्चालनमा ल्याएको बिराटनगरस्थीत दीर्घकालीन पुन:स्थापना गृह पठाउने गृहकार्य गरिएको गौतमले केटिएम दैनिकलाई बताए ।
१८ वर्ष भन्दा कम उमेरका बालिकाहरूसँग सहमतिकै सम्वन्ध राखे पनि त्यो सम्वन्धलाई नेपालको कानुनले बलात्कार ठहर गर्दछ ।
के हो दीर्घकालीन पुन:स्थापना गृह ?
घरेलु तथा लैङ्गिक हिंसाबाट पीडित भएका महिला तथा बालिकाहरूले भय, डर, त्रास तथा असुरक्षा महसुस गरी आफ्नो घर परिवार र समाजमा बस्न नसक्ने भएमा उनीहरूलाई सुरक्षित आवास गृहमा राखिन्छ ।
घरेलु हिंसा सम्बन्धी नियमावली, २०७६ को नियम १९ ले दिएको अधिकार प्रयोग गरी प्रदेश नम्बर १ को सामाजिक विकास मन्त्रालयले विराटनगरमा दीर्घकालीन पुन:स्थापना गृह सञ्चालन गरिरहेको छ ।
त्यहाँ रहेकाहरूलाई सरकारले सुरक्षित परिसर सहितको सुविधा सम्पन्न आवास गृह उपलब्ध गराएको छ भने उनीहरूलाई लत्ताकपडा, दैनिक खाना र खाजाको सुविधा साथै स्वास्थ्य उपचार सम्बन्धी व्यवस्था हुन्छ ।
दीर्घकालीन पुन:स्थापना गृह (सञ्चालन तथा व्यवस्थापन) निर्देशिका, २०७७ का अनुसार पुन:स्थापना गृहमा रहेका पीडितहरूलाई मनोसामाजिक मनोविमर्श, कानुनी परामर्श सेवा पनि उपलब्ध हुन्छ ।