नेकपा (एमाले) का नेता एवम् पूर्व मन्त्री महेश बस्नेतले उपत्यकामा चल्लाहरू जति नै बासे पनि प्रगति गर्ने भनेको एमाले नै भएको बताएका छन् ।
राष्ट्रिय युवा सङ्घ नेपालको उपत्यका स्तरीय युवा भेलामा बोल्दै उनले केही मानिसले उपत्यकामा एमालेमाथि अरु नै शक्ति हाबी भयो भन्ने सोचेका छन् तर त्यो चल्लाहरू बासेका मात्र हुन् प्रगति गर्ने एमाले नै भएको दाबी गरेका छन् ।
उनले भने ‘उपत्यकामा एमाले कमजोर भयो अरू नै हाबी हुन थालेका छन्, युवाहरू एमालेमा छैनन् भनेर भन्नेहरूलाई पछि राम्रो जवाफ हामी दिनेछौ । उपत्यका भित्र एमालेको उपस्थिति के छ भन्ने जवाफ दिन्छौ । मान्छेलाई के लाग्या छ, एक दुई वटा चल्लाहरू बासेका छन् । अण्डा तिनीहरूले दिएकै भन्ने सोच्न थाल्या छन् । अण्डा चल्लाले होइन, नेकपा एमालेले दिएको हो, भोलि नि दिनेछ ।’
उनले आगामी निर्वाचनमा एमाले विरुद्ध कोही पनि टिक्न नसक्ने भन्दै काङ्ग्रेसलाई पनि एमालेको अगाडी आउन माधव नेपाल, प्रचण्ड र उपेन्द्र यादवको बैसाखीको सहारा चाहिने बताए ।
बस्नेतले भने ‘एमाले विरुद्ध किन गठबन्धन बनाइँदै छ, एउटा हामीसँग प्रतिस्पर्धा गर्न लायकको रुख बुढो भएको छ, खोक्रो भएको छ अब काङ्ग्रेस हामीसँग एक्लै लड्न सक्दैन । लड्नको लागि माधव नेपाल, प्रचण्ड र उपेन्द्र यादवको बैसाखी चाहिन्छ ।’
कार्यक्रममा बोल्दै उनले नेकपा एमाले श्रमजीवी र सर्वहाराको पक्षमा र ४० प्रतिशत महिलाको अधिकारको लागि आन्दोलन गरेको र त्यसको उपलब्धि स्वरूप राष्ट्रपतिमा महिला आएको पनि बताएका छन् ।
कार्यक्रममा ३३ मिनेट भाषण गरेका बस्नेतले भने, ‘हामी वर्गीय पक्षधर हुन्छौ, हामी श्रमजीवी र सर्वहाराको पक्षमा हुन्छौ । ४० प्रतिशत महिलाको सुनिश्चितता बनाउन एमाले लाग्यौ र उपलब्धि पाए । आज विद्यादेवी भण्डारीलाई राष्ट्रपतिको रूपमा देखेका छौ त्यो हाम्रो आन्दोलनको उपलब्धि हो । किसान मजदुरको लागि कम गर्छौ, हाम्रा लक्ष्य अनुसार हामी अगाडी बढ्छौ ।’
उनले मुलुक निर्माणमा केपी ओलीले समाएको हात, देखेको सपना, बोकेको अभियान र विश्वास खेर नजाने बताउँदै उपत्यकामा एमालेको शक्ति आगामी निर्वाचनमा देखाउने बताए ।
भिडिओ