नेपाली कांग्रेसका केन्द्रीय सदस्य रामहरि खतिवडाले एमालेका अध्यक्ष केपी शर्मा ओलीको उपचार कांग्रेसले चन्दा उठाएरै भए पनि गर्ने बताएका छन् ।
आइतबार बेलुका ट्वीट गरेर नेता खतिवडाले ओलीको स्वास्थ्य सधैँ राम्रो होसभन्दै उपचार गर्न पैसा नभए कांग्रेसले चन्दा उठाएर भए पनि उपचार गर्ने बताए ।
नेपाल युवा परिषद्ले काठमाण्डौमा आयोजना गरेको राष्ट्रिय युवा सम्मेलनमा बोल्दै उनले आफ्नो र श्रीमतीको नाममा रहेको घर र जग्गा दान गरिसकेको बताउँदै उनले उपचारका लागि आवश्यक परेमा त्यसलाई बेच्न पनि नसक्ने बताए ।
उनले सांसद भएकाले अलिअलि पैसा त आउने तर त्यसले आफ्नो उपचार गर्न नपुग्ने बताए । आफ्नो र श्रीमतीको नाममा रहेको सम्पत्ति राज्यको भइसकेको उनले बताए । उनले भने “सांसद भएकाले अलिअलि त्यहाँबाट आउँछ । नभए म र मेरो श्रीमतीसँग केही छैन । हामीले हाम्रो सबै सम्पत्ति सरकारको नाममा गरिदिएका छौँ । तपाईँहरूलाई थाहा छदै छ होला सरकारको नाममा गरिदिएपछि त्यसलाई बेच्न वा धितो राखेर पैसा निकाल्न मिल्दैन । अब तपाईँहरूले उपचार गराइदिनुभयो भने छुटै कुरा नभए मसँग उपचार गर्ने पैसा छैन ।”
त्यसको जवाफमा कांग्रेस नेता खतिवडाले ओलीलाई उपचारप्रति चिन्ता नलिन आग्रह गर्दै उपचार गर्ने घोषणा गरेका हुन् ।
केपी ओलिलाइ उपचार गर्न पैसा छैन रे?
यति , ओम्नि, वाइड बडी , सेक्युरिटी प्रेसले के हुन्छ ?
सरकारले उपचारको ब्याबस्था गर्ला ,
नत्र काङ्ग्रेस ले चन्दा उठाएर उपचार गर्छ
तर वहाँको स्वस्थ्य सधैं राम्रो होस ।— Ramhari Khatiwada (@RamhariKhatiwa) August 14, 2022
‘सरकारले उपचारको व्यवस्था गर्ला, नत्र कांग्रेसले चन्दा उठाएर उपचार गर्छ’, कांग्रेस नेता खतिवडाले भने, ‘तर वहाँको स्वास्थ्य सधैँ राम्रो होस् ।’