नेपाली कांग्रेसका महामन्त्री विश्वप्रकाश शर्मा आउँदो संघीय निर्वाचनमा झापाको क्षेत्र नम्बर १ वा काठमाडौं क्षेत्र नम्बर पाँच मा उठ्ने चर्चा छ । गत वैशाखमा सम्पन्न भएको स्थानीय तह निर्वाचनमा वडाअध्यक्षले पाएको मतको विश्लेषण गर्ने हो भने महामन्त्री शर्मालाई आफ्नै गृहनगर झापा-१ सहज हुने देखिन्छ ।
२०७४ को संघीय निर्वाचनमा उनी नेकपा (माओवादी केन्द्र) का राम कार्की भनिने सुरेन्द्र कुमार कार्कीसँग दुई हजार ८६३ मतले पराजित भएका थिए । २०७० सालको दोस्रो संविधानसभाको निर्वाचनमा शर्मा एमालेका रविन कोइरालासँग पराजित भएका थिए । २०६८ सालमा कांग्रेस झापा जिल्ला सभापतिमा विश्वप्रकाश शर्मा उद्धव थापासँग पराजित भएका थिए । थापा अहिले प्रदेश सभापति छन् भने शर्मा १४ औं महाधिवेशबाट महामन्त्रीमा निर्वाचित भएका हुन् ।
झापाको क्षेत्र नम्बर १ मा मेचीनगर नगरपालिकाका १५ वटै वडा, भद्रपुर नगरपालिकाको ९ र १०, बुद्धशान्ति गाउँपालिकाको ४,५,६,७ वडा गरी कूल २१ वडा रहेका छन् । वैशाख ३० गते सम्पन्न भएको स्थानीय तह सदस्य निर्वाचनमा २१ मध्ये नेपाली कांग्रेसले १५ वडामा मात्र उम्मेदवार उठाएको थियो भने एमालेले सबैमा । १५ उम्मेदवार मध्येमा बुद्धशान्तिको ४,५,६ र मेचीनगरको ६,८ र १५ गरी जम्मा छ वटा वडाको वडाअध्यक्ष नेपाली कांग्रेसले जितेको थियो । त्यस्तै, एमालेबाट १४ जना र माओवादी केन्द्रबाट एकजना वडाध्यक्ष निर्वाचित भएका हुन् ।
वडाध्यक्षमा एमालेको ३१,२३२ मत, कांग्रेसको २४,०५९ मत र माओवादी केन्द्रको ३,९०५ मत रहेको छ । यो मत ती पार्टीबाट सो पदमा उठेका उम्मेदवारहरूको हो । २१ वडाध्यक्ष पदमा १०७ जना उम्मेदवार रहेकोमा ७० हजार ९२२ मत खसेको थियो ।
एमालेबाट २१ जना वडाध्यक्षका उम्मेदवार भएकाले सतही रुपमा हेर्दा एमालेले बढी भोट पाएको देखिन्छ तर पाएको मतलाई उम्मेदवारको सङ्ख्यासँग तुलना गर्दा एमालेभन्दा कांग्रेसको मत बढी देखिन्छ ।
एमालेले पाएको ३१,२३२ मतलाई २१ उम्मेदवारले भाग गर्दा आउने सङ्ख्या १,४८७.२३ हुन्छ । त्यस्तै कांग्रेसले पाएको २४,०५९ मतलाई सो पार्टीबाट चुनावमा सहभागी भएका १५ उम्मेदवारले भाग गर्ने हो भने आउने भागफल १,६०३.९३ हुन्छ । यसको अर्थ कांग्रेसका उम्मेदवारको संख्या कम भएकाले मत कम आएको हो । औसतमा हेर्न हो भने एमालेले पाएको मतभन्दा कांग्रेसको मत बढी छ । त्यसैले क्षेत्र नम्बरमा एक मा विश्वप्रकाश शर्मालाई सहज हुने देखिन्छ ।
२०७४ को संघीय निर्वाचनमा एमाले र माओवादी केन्द्रको गठबन्धनबाट राम कार्की निर्वाचित भएतापनि यस क्षेत्रमा माओवादी केन्द्रको खासै पकड नभएको माओवादीकै नेताहरू बताउँछन् ।
अब लागौं शर्माको सम्भावित अर्को निर्वाचन क्षेत्र काठमाडौं- ५ । यस निर्वाचन क्षेत्रमा काठमाडौं महानगरपालिकाको २,३,४,५ बुढानिलकण्ठ नगरपालिकाको ३,४,५,६,७ र टोखा नगरपालिकाको २,३, ४,५,६,७ वडा पर्दछन् । कूल १५ वडा रहेको यस क्षेत्रमा स्थानीय तहमा नेकपा एमाले र कांग्रेस दुवैले सबै वडाध्यक्षमा उम्मेदवार उठाएका थिए । १५ वडाको लागि ८० जना उम्मेदवार रहेकोमा ४१,६८८ मत सदर भएको थियो ।
निर्वाचनको अन्तिम मतपरिणाम सार्वजनिक हुँदा एमालेबाट ११, कांग्रेसबाट तीन र स्वतन्त्रबाट एक जना निर्वाचित भए । पाएको मत हेर्ने हो भने एमालेले १९,७०३ मत पाउँदा कांग्रेसले १४,८५३ मत पाएको छ । अघिल्लो स्थानीय चुनावमा काठमाडौं महानगरपालिकाको मेयर पदमा उठेर चर्चा कमाएकी रञ्जु दर्शनाले यही क्षेत्रबाट उठ्ने घोषणा गरेकी छिन् ।
२०७४ सालको संघीय निर्वाचनमा यस क्षेत्रबाट एमालेका इश्वर पोखरेल २३,०२९ मतका साथ निर्वाचित हुँदा उनका निकटतम् प्रतिस्पर्धी नेपाली कांग्रेसका प्रकाश शरण महतले १३,१६९ मत पाएका थिए । पोखरेल झण्डै दोब्बर मतले निर्वाचित भएका थिए ।
एमालेको राम्रो पकड भएको क्षेत्र र रञ्जु दर्शना समेत यही क्षेत्रबाट उठ्ने भएकाले कांग्रेस महामन्त्री शर्माको लागि काठमाडौं-५ भन्दा पनि आफ्नै गृहनगर झापा-१ सहज देखिन्छ ।