प्रदेश र प्रतिनिधि सभा सदस्यका लागि आगामी मंसिर ४ गते हुने निर्वाचनका लागि आजदेखि दल दर्ता गर्न सकिने निर्वाचन आयोगले बताएको छ।
आयोगका अनुसार साउन ३१ गतेसम्म निर्वाचन आयोगमा कार्यालय समयमा दल दर्ता गर्न सकिनेछ। दल दर्ता गर्न सार्वजनिक बिदाका दिन पनि कार्यालय खुला हुनेछ।
आयोगमा साउन १९ सम्म दर्ता कायम रहेका राजनीतिक दलहरूलाई संविधानको धारा २७१ बमोजिम आज साउन २२ गते देखि साउन ३१ गतेसम्म दल दर्ता गर्न आह्वान गरिएको हो ।
दल दर्ताको निवेदनसँगै राजनीतिक दलले आफ्नो विवरण, दलको केन्द्रीय कार्यकारिणी समिति, प्रदेश र जिल्ला समितिका पदाधिकारी तथा सदस्यको संख्या, वार्षिक लेखा परीक्षण प्रतिवेदन पेस गरेको मिति र दलको केन्द्रीय स्तर र प्रदेश स्तरको कार्यकारिणी समितिको पछिल्लो चुनाव भएको मिति उल्लेख गर्नुपर्ने आयोगले जनाएको छ ।
दलले निवेदन दिँदा प्रतिनिधि सभा सदस्यको छुट्टै र प्रदेश सभा सदस्यको हकमा प्रदेशगत रूपमा सात वटा प्रदेशका लागि छुट्टाछट्टै निवेदन पेस गर्नुपर्ने आयोगको सूचनामा जनाइएको छ ।
प्रत्यक्ष तर्फ १६५ सासंद र समानुपातिक तर्फत ११० गरी यो निर्वाचनमा २७५ जना संघीय सांसद त्यस्तैगरी ३३० प्रदेश सांसद र २२० प्रदेश समानुपातिक सासंद गरी प्रदेशको लागि पाँच सय ५० जना सासंद निर्वाचित हुन्छन् ।
अघिल्लो पटकको निर्वाचनमा स्वतन्त्रसहित ५६ जना राजनैतिक दलहरूले संघीय निर्वाचनमा भाग लिएका थिए तीमध्ये एक स्वतन्त्रसहित १० वटा राजनैतिक दलका उम्मेदवारहरू निर्वाचित भएर सासंद बन्दै संसद भवन छिरेका थिए ।