आर्थिक वर्ष २०७८/०७९ मा नेपालमा एक हजार ८०७ वटा इलेक्ट्रिक भेहिकल्स भित्रिएका छन् । यो सङ्ख्या, कार जिप र भ्यानको मात्र हो । यसमा तीन पाङ्ग्रे र दुई पाङ्ग्रे सवारी साधनको सङ्ख्या जोडिएको छैन ।
आर्थिक वर्ष २०७७/७८ जम्मा २४९ वटा सवारी साधन भित्रिएकोमा सरकारले विद्युतीय सवारी साधनमा छुट दिएसँगै आर्थिक वर्ष २०७८/७९ मा उक्त सङ्ख्या बढेको हो ।
भन्सार विभागले सार्वजनिक गरेको तथ्याङ्क अनुसार यसरी भित्रिने सवारीसाधनमा १०० किलोवाट क्षमता सम्मका ९९६ वटा, १०० देखि २०० किलोवाट क्षमताका ७९२ वटा रहेका छन् ।
त्यस्तै गरी १०० देखि १५० किलोवाट क्षमतामा १३ वटा २०० देखि ३०० किलोवाट क्षमताका चार वटा र ३०० किलोवाट भन्दा माथिका दुई वटा सवारीसाधन छन् ।
यी सवारी साधन नेपाल भित्र्याउँदा पाँच अर्ब ३२ करोड रुपैयाँ विदेश पुगेको छ भने सरकारले राजश्व बापत एक अर्ब ४३ करोड कमाएको छ ।
नेपालमा भित्रिएका विद्युतीय सवारी साधनमा चीन अगाडि देखिएको छ । उक्त देशबाट ८२३ वटा सवारीसाधन नेपाल भित्रिएका छन् । यसरी भित्रिने सवारीसाधनमा १५० देखि २०० किलोवाट क्षमताका ६५६ र १०० किलोवाट सम्म क्षमताका भएका १६७ रहेका छन् ।
दोस्रो मा भारत रहेको छ । यहाँबाट १०० किलोवाट सम्म क्षमता भएका ६९६ विद्युतीय सवारीसाधन नेपाल भित्रिएको देखिन्छ । एउटै क्षमताका साधनमा भारत र चीनको तुलना गर्ने हो भने भारतबाट भित्रिएका सवारीसाधनको मूल्य सस्तो देखिन्छ ।
भारतबाट भित्रिएका १०० किलोवाट भन्दा कम क्षमताका विद्युतीय सवारीसाधनको प्रतिगोटा मूल्य २४ लाख ९० हजार पर्दा चीनबाट भित्रिएका सोही क्षमताका सवारी साधनको मूल्य २७ लाख ४० हजार माथि छ ।
अमेरिकाबाट १०० देखि १५० किलोवाट क्षमताका १३ वटा, १०० देखि २०० किलोवाट क्षमताका छ वटा, २०० देखि ३०० किलोवाट क्षमताका चार वटा र ३०० किलोवाट भन्दा माथिका दुई वटा सवारी साधन भित्रिएका छन् ।
अमेरिकाबाट भित्रिएका १०० देखि १५० क्षमताका सवारीसाधनबाट सरकारले लिएको राजश्व शून्य छ । यसको अर्थ यी सवारीसाधनहरू कूटनीतिक प्रयोजनका लागि भित्रिएका हुन् ।
त्यस्तै गरी दक्षिण कोरियाबाट १०० किलोवाट क्षमतासम्मका १३२ वटा र १०० देखि २०० किलोवाट क्षमताका ५२ वटा सवारीसाधनहरू भित्रिएका हुन् । हुन्डाई कोरियन कम्पनी हो ।