सिरहाको लहान नगरपालिकाका उपमेयर राम चलितर महतोविरुद्ध बलात्कार प्रयासको जाहेरी परेको छ । एक महिलालाई जागिरका लागि ‘सोर्स’ लगाइदिन्छु भन्दै कोठामा लगेर बलात्कारको प्रयास गरेको भन्दै उनीविरुद्ध जाहेरी दर्ता भएको हो ।
पीडित महिलाले उपमेयर महतोमाथि इलाका प्रहरी कार्यालय लहानमा जबरजस्ती करणी उद्योगसम्बन्धी जाहेरी दर्ता गराएकी हुन् । केही दिनअघि नगरपालिकामा दैनिक ज्यालादारीमा कम्प्युटर अपरेटरसम्बन्धी विज्ञापन खुलेको थियो ।
ती महिलाले कम्प्युटर अपरेटर पदमा फारम भरेकी थिइन् । जागिरको लागि ‘सोर्स’ लगाइदिन्छु भन्दै कार्यकक्षको गोप्य कोठामा बोलाएर बलात्कार प्रयास गरेको पीडित महिलाको आरोप छ । राजनैतिक दबाबका कारण गाउँमै पञ्चायती गरी घटना लुकाउन प्रयास गरिए पनि अन्ततः उनले प्रहरीमा जाहेरी दिएकी बताइएको छ।
उपमेयर महतोविरुद्ध जाहेरी दर्ता भइसकेको र घटनाबारे थप अनुसन्धान भइरहेको जिल्ला प्रहरी कार्यालय सिरहाको प्रवक्ता तथा डीएसपी सुवास बुढाथोकीले जानकारी दिए ।
केटिएम दैनिकसँगको टेलिफोन सम्पर्कमा बुढाथोकीले भने “जाहेरी परेको सत्य हो । उहाँ सम्पर्कविहीन हुनुहुन्छ । हामीले खोजी कार्य जारी राखेका छौं । सम्पर्क भएपछि कानुनअनुसार कारबाही अगाडि बढाउँछौं ।”
महत्तो गत बैशाख ३० गते सम्पन्न भएको स्थानीय तह सदस्य निर्वाचनमा जनता समाजवादी पार्टी, नेपाल बाट निर्वाचित भएका हुन् । महतो १२,५७९ मतका साथ निर्वाचित हुँदा निकटतम प्रतिस्पर्धी एमालेकी सरियार कुमारी चौधरीले ११,७९० मत पाएकी थिइन् ।