नेपाल भ्यूज मा कार्यरत पन्ध्र जना पत्रकारहरूले सामूहिक राजीनामा दिएका छन् । उनीहरूले श्रावण ४ गते उक्त अनलाइनका प्रधानसम्पादक समक्ष राजीनामा बुझाएका हुन् ।
राजीनामा पत्र बुझाएका पत्रकारहरूले गत जेठदेखि सञ्चालकका कारण सिर्जित समस्याका कारण नेपाल भ्यूजको समाचार कक्ष कार्यमैत्री हुन नसकिरहेको बताएका छन् ।
उक्त समाचार संस्थाको सञ्चालक कम्पनी ‘डिजिटल हाउस प्रा. लि. का सिइओ रहेका विश्वदीप पाण्डेले २२ जेठमा सबै सहकर्मीमाझ आफू आर्थिक संकटमा फसेकाले न्यूजरूमको आकार सानो बनाउन खोजेको जनाउँदै साथीहरूलाई यस संस्था परित्याग गर्न मौखिक रूपमा आग्रह गरेको पनि उनीहरूले राजीनामा पत्रमा खुलाएका छन् ।
संस्थामा काम गर्ने विश्वासको वातावरण सिर्जना नभएको महसूस गर्दै २६ असारमा नै उनीहरूले व्यवस्थापन समक्ष राजीनामा पत्र बुझाएको खुलेको छ । त्यसपछि व्यवस्थापनले कात्तिकदेखि तलब वृद्धि हुने, त्यतिञ्जेलका लागि मासिक तीन हजार रूपैयाँ तलबमा थप गर्नेगरी एक वर्षको करारपत्र दिने सहमति भएकाले उनीहरूले काम सुरु गरेको जनाएको छन् ।
तर व्यवस्थापन उक्त कुरामा अडिग नभएको भन्दै १५ जना पत्रकारहरूले श्रावण ४ गतेदेखि लागू हुने गरी सामूहिक राजीनामा दिएका छन् ।
यसरी सामूहिक राजीनामा दिइएका घटना नेपाली सञ्चारमाध्यममा आइरहन्छन् । यसअगाडि नेपाल पब्लिकमा कार्यरत सञ्चारकर्मीहरूले पनि सामूहिक राजीनामा दिएका थिए भने अन्नपूर्ण पोष्ट दैनिकमा कार्यरत पत्रकारहरूले पनि सामूहिक राजीनामा दिएका थिए ।
पत्रकारहरूलाई पारिश्रमिक नदिने, मालिकहरू मोटाउँदै जाने भन्दै बेलाबेलामा चर्चा बहस पनि भइरहन्छ । त्यसमा केही सत्यता पनि छ तर अर्को कुरा के हो भने नेपालमा आवश्यकता भन्दा बढी सञ्चारमाध्यमहरूले उदय भएको छ । झन् अनलाइन सञ्चारमाध्यमको सङ्ख्यात्मक वृद्धि त निकै छ । जुन नेपालको विज्ञापन बजारले थेग्न सक्दैन ।
यस्तो छ सामूहिक राजीनामा पत्र ।
नोट: सामूहिक राजीनामा पत्रमा हस्ताक्षर गर्ने पत्रकारहरूको नाम हटाइएको छ ।